SHILLONG: Meghalaya a·doko load shedding ba bijoli kimitaniko Sombar waljatchi dipet chu·gimik ra·galna gita sorkari tik ka·angaha.
Meghalaya a·doko bijoli chalaigipa mitam karkanarang nosto ong·ani a·sel batanggimin somoirango bijoli chu·ongjae, a·dokni pilak biaprangon somoiko sualgrike baditaba kontarangna bijoliko kimitna gita nangahachim indiba da·o obostarang namkalangahani gimin bijoli kimitaniko chu·gimik ra·galna gita Meghalaya Energy Corporation Limited (MeECL) tik ka·angaha ine u·iataha.
Iani bidingo a·doko songdongenggipa manderangna u·iataniko on·angengon, a·doko obostarang namkalahani gimin da·o bijoli kimitaniko chu·gimik ra·galatengaha aro bijoli chu·onggijanikoba maming koros nanggija bank gita on·na tik ka·aha ine a·dokni Chief Minister Conrad K Sangma parakataha.
Chief Minister-ni parakatani gitade, a·doko nosto ong·e dongenggipa unit-rangoni bang·batan da·o kam ka·taipiltaiengahani gimin bijoliko manderangna nanga gita on·na man·gnok indiba Khondong aro Kopili-oni NEEPCO-na on·enggipa unit-rangko da·o dipet a·bachengatpiltaina man·kujaenga.
“Batanggimin somoirango an·ching bijoli chu·ongjani a·sel somoi gita bijoliko kimitna nangao ga·akaha indiba da·o bijoli on·enggipa unit-rang bang·batan nampilahani gimin bijoli kimitaniko dontongna man·engaha. Bijoliko kimitengmiting somoirango ching baksa bakrimanirangko on·ahani gimin anga dingtangmancha a·doko songdongenggipa manderangko mittelpilna ska,” ine Chief Minister parakataha.
Meghalaya a·doko nanga batpile mikkarang waangahaoba bijoliko kimitna nangahani gimin a·doko songdongenggipa manderang bang·batan sorkariko aro Power department-ko matnangtokahachim ine nikna man·a.
