A·doko CrPC, CPC ra·gatna miksonganiko EGH-ni Nokmarang jegalgrima

TURA: Meghalaya a·dokni Scheduled a·jarangoba CrPC aro CPC ra·gatna a·dok sorkarini parakataniko East Garo Hills a·jani Nokma Council, raken jegalataha.
Sonibar salo, East Garo Hills a·ja gimikni Nokmarang, Williamnagar-o donggipa Nokma Council Hall-o tom·aniko ong·atangenba, a·dokni scheduled a·jarango CrPC aro CPC ra·gatna sorkarini parakataniko raken jegalangtokaha.
“CrPC aro CPC-ko Meghalaya a·dokni ning·o donggipa pilak kacharirangon nangategen indiba ian District Council court aro Village Court-nade nangchakeani dongjawa ine Chief Minister aganaha. Indake ong·genchimoba, Schedule area-ni ning·o donggipa kacharirang, chong·motan District Council court aro village court-rangna on·gimin bilrangko magistrate-rangnaba on·na nanga ineba ua agantaiaha. CrPC aro CPC-ni bilrangko magistrate-rangsan man·aiani gimin ua ‘Magistrate’-ni orto aro daitorangko talen ma·sienga ine chinga ka·donga. CrPC aro CPC-ko Parliament-sa niam tariahani gimin ian scheduled a·jarangode nangchakeani dongna man·ja,” ine East Garo Hills Nokma Council-ni tom·anio dilgiparang parakataha.
Nokma Council-ni parakatani gitade, chengonin A·chikrang, Village Court, Laskar court aro District Council court-rangkosa jakkalbae, dingtangmancha jatni niamrangko ja·rikgiparang ong·achim. “Songo noko maiba neng·nikanirang ba meligrikgijanirang ong·katgenchimoba A·chikrango dingtangmancha bichalrangko ka·e namatna gita Chatchi Maharina aro Nokma-Sordarrangna on·gimin bilrang donga. Songni nokni manderang district court ba police station-rangchi re·na man·jagenchimoba, A·chikrang ia niamrangkon ja·rikengani gimin ian Chatchi-Mahari, A·chik nokdangrang aro songni nokni manderangna namgni ong·a,” ine EGH-ni Nokma Council parakataha.
Gital chasongni kri District Council court aro village court-rango jakkalna nanggipa niamrangko Chief Minister na a·dok sorkari taridapna nanggenchimode iako Nokmarang jegalani dongjawa indiba Parliament-ni niamrangko Sixth Schedule-o ra·gatanikode raken jegalaigen ineba East Garo Hills a·jani Nokma Council parakataha.