Save Hynniewtrep Mission-ni ning·o dol 5 NGO-rang jingjengatangna tik ka·a

SHILLONG: Inner Line Permit (ILP)-ko ra·gatchina, Khasi ku·sikko Eighth Schedule-o chapatchina aro uandakgipa dingtang dingtang dabianirangko chu·sokate on·kujaengani gimin Save Hynniewtrep Mission-ko ra·gatgipa dolbonga NGO-rang, bilakbate jingjengatanirangko dakangna gita Mongolbar salo tik ka·e donangaha.
Iani bidingo dolbonga NGO-ni dilgiparang, a·dokni Home Minister-ko gronge agangrikaha ine janapatengon, “Chinga Save Hynniewtrep Mission-ko a·bachengate da·alonin bilakbate jingjengatanirangko dakanggnok ine Home Minister-na aganaha,” ine Hynniewtrep Youth Council (HYC)-ni general secretary Roykupar Synrem parakataha.
Synrem-ni parakatani gitade, Shillong songjinmao uamang maming u·iatsoani gri jingjengatanirangko dakanggen ineba NGO-rang, a·dok sorkari aro district administration-na u·iataha.
“Shillong-osan ong·aigija, je biaprango jinma tom·ani, party-tangni tom·ani ba uandakgipa program-rangona chief minister, deputy chief minister ba je minister-ba re·angchina, chingni membor-rang ua biaprangona re·ange chingni mingsku dabienggipani gimin gisik ra·ataniko on·anggen,” ine HYC-ni general secretary parakataha.
NGO-rangni mingsku dabianirangoni mitamranga ILP-ko ra·gatchina, Khasi ku·sikko Eighth Schedule-o chapatchina, Assam-Meghalaya-ni soi ka·grikgipa MoU-ko nipiltaichina, Harijan Colony-o songdongenggipa manderangko apjitchina, HNLC-ni gitcham dilgipa Cheristerfield Thangkhiew-ko so·otgipani bidingo CBI ba judicial inquiry-ko dakatchina, Gambling Act-ko chu·gimik ra·galchina aro uandakgipa dabianirangan ong·engachim.
Uamangni dabienggipani bidingo Home Minister maikoba ku·rachakaniko on·ahama ine sing·on, “Ian political department-ni ning·osa ong·ani gimin ua chingna ku·rachakaniko on·na gita maming bil dongja ine Home Minister chingna aganaha. Uni gimin chingni nanganirangna aganchakaniko on·na man·gipa ba bil donggipa manderangna ua u·iatskachina chinga una aganbaaha,” ine Synrem parakataha.
Section 144 CrPC-ko pe·ani gimin sing·on, “An·tangtangna on·gimin bilo pangchake an·tangtangni man·gnina jingjengatenggipa manderangko warachakna gita niamrangko ra·gatna bil dongja ine Supreme Court-an changni chang aganmanaha,” ine HYC-ni general secretary talataniko on·angaha.