WILLIAMNAGAR: 2021 bilsini September 30 tariko MTC bus gari a·sel ong·e sianggipa aro saknaa man·gipa manderangni nokdangrangna gong lak 7 ka·e compensation-ko gamataha.
Re·anggipa 2021 bilsini September 30 tariko, Tura aro Williamnagar-oni Shillong-ona manderangko salangenggipa MTC bus gari, Rongjeng-oni km 10-mang chel·ao donggipa Nongchram dolongoni Ringdi chiringona ga·akonange a·sel ong·ahachim.
Ia a·sel ong·ani ja·mano an·tangtangni ka·sagimin manderangko gimaatna nanggipa nokdangrang, Williamnagar-o donggipa Motor Accident Claim Tribunal (MACT)-o Motor Accident Claim (MAC)-ko ka·aha aro iani bidingo u·iataniko man·soahaon, Meghalaya Transport Corporation (MTC)-ni official-rang, an·tangtangni ukil gita, a·sel ong·anichi duko ga·akgipa nokdangrangna gong lak 7 ka·e compensation-ko gamna ku·rachakaha.
MTC official-rangni ku·rachakaniko man·e, duko ga·akgipa nokdangrang, kakket bichalko man·na gita ia case-ko ra·galaha aro apsan salon, sianggipa manderangni nokdangrangna lak-prak ka·e aro saknaa man·gipa manderangna gong 50,000/- ka·e gamahachim.
Indake ong·genchimoba uni ja·man MTC-ni official-rang, an·tangtangni ku·rachaka gita compensation-ko gamningjahani gimin, duko ga·akgipa nokdangrang Meghalaya High Court-ona re·ange badi ka·doangtaiaha aro uandaken MTC-ni official-rangko jagittamni gisepon compensation-ko gamchina rai on·ataha.
Bon·kame, re·anggipa November-ni 7 tariko, duko ga·akgipa nokdangrangna MTC-ni gita nokdang ge·prako gong lak 7 tangkarangko chu·gimik gamataha ine kobor on·aha.
Bus gari a·sel ong·anio sianggipa aro saknaa man·gipa manderangara, Nengkra-oni Pukan N Marak (tangrikkuenggipa), Damra Laskerpara-oni Sengsrang R Marak sagi, PWD Old Colony-oni Tangsimbirth M Sangma sagi, Williamnagar Bolkinggre-oni Trawin R Marak sagi, Williamnagar Rangmalbadim-oni Dimsi M Sangma sagi, Williamnagar Chidekgre-oni Larseng M Marak sagi aro Williamnagar Balsrigittim-oni Chekamchi M Sangma sagi ong·a.
