SHILLONG: Mawpdang-niko a·a breanio gong kror 140-na baten tangka paisarangko jakkalsretaha ine Mongolbar salo, Meghalaya Trinamool Congress (TMC)-ni office-o press conference-ko ong·atanio a·dok sorkariko matnangataha.
A·dokni tangka paisarangko jakkalsretani bidingo a·dokni manderangna aganchakchina gitaba TMC-ni dilgipa Mukul Sangma, NPP-chi dilgipa MDA sorkario dabiangaha.
“MDA, jekon anga Meghalaya Deceitful Alliance ine mingskagenchim, da·oba changsataie, Mawpdang-ni Mawkhanu songoniko acre 807-mang ong·gipa a·ako breanio a·dokni tangka paisarangko ra·seke ra·taiaha. A·arangko brena gita sorkari, gipin dolko rimaha aro uandaken, a·a nokgiparangna square feet-prako gong 45-ko on·e, songni manderangoniko a·a bregipa dolnade square feet-prako gong 85 ka·e gamskaaha,” ine Dr Sangma parakataha.
Dr Sangma-ni aganani gitade, damrangko 2021 bilsini October 4 tariko cabinet tik ka·ahachim aro ia proposal-ko urban affairs minister dakdilenba ia proposal-ko revenue department ra·chakahachim. “Cabinet-ni pilak kamrangkon chief minister-sa ra·chakengani gimin lekkao mesokani gitade, CM, Revenue Minister aro Urban Affairs Minister sakgittaman, a·a nokgiparangna on·skana man·gipa gong kror 140 tangkarangko jakkalsretaha,” ine TMC-ni dilgipa aganaha.
Ia tangka paisarangko jakkalsretani gimin ma·mong sorkari ja·kuko de·na nangchongmota ineba ua aganaha.
“Adita salrangna skang, election-na tom·aniko ong·atanio, Union Home Minister Amit Shah an·tangan, a·doko tangka paisarangko jakkalsretanina a·dok sorkariko matnange aganangaha aro Meghalaya a·dokkoba a·songo tangka paisa jakkalsretbatsranggipa a·dok ine matnangataha. Iandake matnanganiara a·dokko aro a·dokni manderangko namen ong·siataha. Tangka paisa jakkalsretanide a·doko songdongenggipa manderangni janggi tangani bewal ong·ja aro chingni manderangde iandake mikbokrakgipaba ong·ja. Uni gimin a·dok sorkarini ia tangka paisa jakkalsretaniko ta·raken sandirokatchina anga uko didienga,” ine Sangma aganaha.
NPP aro BJP sorkarini somoio, Saubhagya scheme-ko jakkalsretani, Smart Meter scheme-ko jakkalsretani, Assembly-ni protchong be·gruani aro da·o iandake a·arangko breanio tangka paisarangko jakkalsretaniara ia sorkarini kamko mesokani ong·aha ineba Opposition dolni dilgipa parakataha.
