SHILLONG: Mukroh songko Assam a·dokni West Karbi Anglong a·jao ga·aka ine Assam Assembly-o Chief Minister Himanta Biswa Sarma-ni a·kanganiko Meghalaya a·dokni Deputy Chief Minister Prestone Tynsong jegalatskaenba, Mukroh songara Meghalaya a·dok ning·o ga·aka ine parakatskaaha.
Assam Chief Minister-ni a·kanganiko jegalatengon, Mukroh songara Meghalaya a·dokni West Jaintia Hills a·jao ga·akgipa songan ong·a ine Tynsong, talataniko on·angaha.
“Mukroh songara namemanchaan Meghalaya a·dok ning·o ga·akgipa songan ong·a aro da·alona kingking ia song Meghalaya a·dokni ning·on ong·enga,” ine Tynsong aganenba, Assam CM-ni a·kanganiara namen kragijani ong·aha ine parakataha.
Re·anggipa Sombar salo, Assam Assembly-o Diphu-ni BJP MLA Bidya Sing Engleng-ni sing·anina seachi aganchakaniko on·angengon, Mukroh songara Assam a·doko ga·akgipa songan ong·a aro ia songara West Karbi Anglong a·jao ga·akgipa song ong·a ine Assam-ni Chief Minister Himanta Biswa Sarma a·kangatahachim.
Iani bidingo Assam sorkari, Meghalaya sorkarina u·iatna nangengkua ineba Sarma parakatahachim.
Assam Chief Minister-ni iandake a·kanganiko jegalatskaengon, “Maini gimin Assam-ni CM iandakgipa kattarangko aganaha anga ma·sija. Simani bidingo gnigipa agangrikaniko chinga a·bachengna siengahachim aro ua iandakgipa kattarangko aganna nangjachim,” ine Tynsong parakataha.
Iani bidingo Meghalaya sorkari, Assam sorkarini kosako jegalaniko dakgenma ine sing·on, “Chinga agangrikaniko a·bachengna siengaha, uni gimin una senge nikubo,” ine a·dokni Deputy Chief Minister aganaha.
