SHILLONG: Adita salrangna skang matchotanggipa Meghalaya Legislative Assembly-o Congress dol chu·sokgipa ong·jahani gimin a·doko Congress-ni dilgiparangko matnangtokengon, ma·mongon Congress dolko bilakatpiltaina man·genchimosa a·dokoba bilakatpiltaina man·gen ine a·dokni dilgiparang parakatskaaha.
Ia bilsini Meghalaya Assembly election-o Congress dol, a·dokni gimik dam 60 constituency-rangon susaahaoba dambonga seat-rangkosan chena man·aiahachim.
Ia election-o Congress dol chu·sokjahani gimin janapatengon, ma·mongon Congress dolko bilakatchengna man·genchimosa a·dokrangoba Congress dolko bilakatpiltaina man·gen ine Congress dolni saksa dilgipa parakataha.
BJP-ni gimin toe janapatengon, ma·mongo BJP-ni dilgiparang bilakani a·selsa, Meghalaya a·doko BJP MLA sakgnisan donggenchimoba, changgnina joljol Meghalaya a·doko bakrime sorkariko rikna man·aha ine Congress dolni dilgipa parakataha.
Ia chang Meghalaya Assembly election-o Congress dol, Ri Bhoi a·jao seat damgni, West Khasi Hills aro Garo Hills-o seat damprak aro Greater Shillong jolo seat damsako chee gimik dambonga seat-rangkosan chena man·aiahachim indiba Jaintia Hills-ode seat damsakoba chesrangjahachim ine nikna man·a.
Indake ong·engon, election-rango Congress dol, doltangni gisepon susagrikengani a·selsa chu·sokgipa ong·na man·jaenga ineba Congress dolni dilgipa parakataha.
Iani bidingo talataniko on·angengon, Assam-o Congress dolni dilgipa Himanta Biswa Sarma, sakgipin dilgipa Tarun Gogoi baksa meligrikna man·jae BJP-o napangaha aro Meghalaya a·dokoba Congress dolni dilgipa Mukul Sangma, Vincent Pala baksa meligrikna man·jae TMC-o napangskaaha ine ua parakataha.
Election-o gipin dolni candidate-rangde krorni kror tangka tangkarangko koros ka·e Congress dolde an·tangtangni candidate-rangna lak 5-mangmangkosan on·ahani a·selba election-o chu·sokgipa ong·na man·jaha ineba Congress dolni dilgipa parakataha.
