TURA: A·chik Holistic Awakening Movement (AHAM) doloni ong·katgrima ine a·kangenggipa sak 71 membor-rangara ra·gala man·gimin gitcham membor-rangsa ong·a ine AHAM-ni president George Prince Cheran Momin a·kangatenba, ia membor-rang an·tangtangko niksengatna gitasa AHAM CEB aro gipin unit-rangni bimingko ra·aha ine parakataha.
“AHAM CEB Tura aro Bolori, Aradongga baksana Boko unit-ni sak 71 membor-rang ong·katgrimaha ine songbadrangoniko niksoe anga namen jagokmanpilaha. Da·alona kingking anga kam watani chitti kingsakoba man·soa dongkuja aro songbadrango janapgimin bimingrangara gimikan AHAM-ni gitcham president Champion R Sangma-ni somoio ra·gala man·gipa membor-rangsa ong·achim,” ine Momin parakataha.
Ia membor-rang, suk ong·nikjae an·tangtangko media-rango mesokna gitasa AHAM-oni ong·katgrimaha ine media-rangna parakataha ineba ua talataniko on·angaha.
“Indake ong·genchimoba anga kusi ong·a maina bang·bea graduate aro post graduate ong·gipa chadamberang da·o AHAM-o naptokaha aro uamangchin chinga a·songna dingtanganiko ra·bana man·gen,” ine AHAM-ni president parakataha.
Adita salrangna skangsan, AHAM central executive board (CEB) membor-rangko man·chape, dingtang dingtang unit-rang, jekai Bolori, Aradonga, Boko unit aro Assam zonal-ni gimik sak 71 membor-rang, kamtangtangko wate doloni ong·katgrimaha ine koborko on·ahachim.
