SHILLONG: Khasi Hills Autonomous District Council (KHADC)-o UDP-chi dilenggipa Executive Committee-ko be·gruatanio jak dongja ine a·dokni Deputy Chief Minister aro NPP-ni dilgipa Prestone Tynsong parakataha.
KHADC-o NPP aro Congress dolrangni bakrimanichi a·dokni MDA 2.0 sorkarioba nangchakeaniko ra·bagenma ine sing·anina aganchakaniko on·angengon, District council aro Assembly-ni gisepode dingtanggrikani donga aro district council-rangode jeba je dol baksaba bakrimna man·aia ine Tynsong parakataha.
UDP-chi dilenggipa KHADC-ni EC-ko be·gruatanio NPP-ni jak dongani gimin sing·on, ua an·tangde iani gimin mamingkoba ma·siani dongja aro iani giminde MDC-rangsa nambate talataniko on·na man·gen ine Tynsong parakataha.
“Anga saksa District Council Affairs Minister ong·e a·dokni damgittam district council-rangni namgninasa kamko ka·na nanga aro EC-rangko pe·anide angni kam ong·ja. District council-rangode seokako man·gipa membor-rangsa an·tangtangni dilgiparangko seoka,” ine Tynsong parakataha.
District council-ni gital EC membor-rangko seokanide CEM-ni daitosa ong·ani gimin ua an·tangde gital EC-o sawarang membor ong·gen aganna man·jawa ineba DCA Minister parakataha.
