TURA: Ganol chibimao aro mongsongbate Rongram bazar-o skatang jabolrangko galengani a·sel da·o Ganol project-o jabolrangni sikkonge dongako nikna man·engani gimin Ganol chibimako rongtale rakkichina gita West Garo Hills a·jani District Administration, Rongram bazar-o dokkan dakenggiparangko aro mongsongbate Rongram Bazar Committee-ko ge·etangaha.
Iani bidingo West Garo Hills a·jani Deputy Commissioner Jagdish Chelani-ni parakatani gitade, Ganol chibimako rongtale rakkina gita Rongram Bazar Committee-oniko gong lak 1 tangkarangko dai ra·gen aro ia tangkarangchi Rongram bazar-ko rongtal an·tale rakkina kam ka·anggen.
Rongram bazar-o jabolrangko galchakna gita dingtangmancha biapko ra·gen aro iana tangka paisarangko District Administration on·gen.
Deputy Commissioner-ni parakatani gitade, ua an·tangan Ganol project-ona re·ange, ia damko dingtang dingtang dolrang baksa rongtalatchina gita Ganol project-o kam ka·enggipa manderangko ge·etangaha.
Pringo pringni Ganol project-ni manderang, Tura Municipal Board, Rongram Bazar Committee aro songsalna kam ka·enggipa dolrang baksa rongtalatgen ineba DC parakataha.
Ganol dam-ko rongtalatanio maming a·selrang ong·jana gita rongtalatengmiting somoio State Disaster Response Force (SDRF)-ni sipairang nitimanggen ineba DC parakataha.
Indake ong·engon, mikkangchi Ganol chibimao skatang jabolrangko galjana gita Rongram bazar jolrango songdongenggipa manderangna dingtangmancha mikrakatani ba agan-talate on·ani program-rangko ong·atgen ineba Deputy Commissioner parakataha.
