SHILLONG: Re·anggipa Sombar attamo, Ri Bhoi a·jani Umsohlait songo donggipa nokdang ge·sako goera goaha aro ia goera goanio nokdangni bi·sa bakgitchak saksako man·chape gimik saksni manderang, saknaanirangko man·na nangaha.
Koborko on·ani gitade, saknaaniko man·gipa manderangoni bi·sa bakgitchak bilongbate saknaanirangko man·aha aro uko Shillong songjinmani Nazareth Hospital-ona ra·enga sanna bananiko on·enga.
Goera goako man·e ia nokko chu·gimik wa·al kamgopaha ineba kobor on·timgiparang parakataha.
Ia nokdangni mande sakbrikode sanna bananirangko on·e hospital-oniko watpilataha ineba kobor on·aha.
Adita salrangna skangsan, Mawsynram jolo donggipa Mawjem songoba, mande sakgni goera goa nange sina gita nangahachim.
Goera nanga man·e sianggipa mande sakgniara, Mawdon songoni bilsi 55 ong·gipa Skylait Donbon aro Mawkham songoni bilsi 19 ong·gipa Wallambok Rapsang ong·achim ine kobor on·aha.
