SHILLONG: Meghalaya a·dokona gipin a·dokrangoniko na·tok ra·bae palaniko champengatani sal 15 matchotangani ja·man, gipin a·dokrangoniko na·tokrangko ra·bataina a·bachengatahani gimin Mongolbar salo, Fisheries department-ni official-rang, na·tokrangko porikka ra·e sample-rangko ra·na a·bachengataha.
Gipin a·dokrangoniko ra·bagipa na·tokrango formalin samrangko man·ahani gimin re·anggipa June 9 tarikonin a·doko gipin biaprangoniko na·tok ra·bae palaniko sal 15-na champengatahachim aro uandaken sal 15 matchotangani ja·man da·o na·tok badinggiparang, gipin a·dokrangoniko na·tokrangko ra·bae palna a·bachengtaiengahachim.
Indake ong·engon, Mongolbar salo Fisheries department-ni official-rang, Shillong songjinmani Bara Bazar (Iewduh)-o palenggipa na·tokrangko porikka ra·enba sample-rangko ra·angaha.
Gipin biaprangoniko ra·baenggipa na·tokrangko porikka ra·anichi noksan ong·atako man·na nangskaengani gimin na·tok badinggiparang suk ong·gijaniko paraktokskaaha.
Na·tokrangko porikka ra·engon, ta·rake result-rangko mesokskachina gitaba na·tok badinggiparang sorkariko didiataha.
“Na·tokrangko ra·baani ja·man bakan palna man·jaode na·tokrang sona a·bachengaia aro ching gita na·tok badinggiparang namen noksan ong·atako man·na nanga. Uni gimin porikkarangko ra·engon, chingnaba noksan ong·jana gita ta·raken sample-ni result-rangko on·skachina chinga sorkariko didienga,” ine Bara Bazar-o na·tok palenggipa manderang parakataha.
