U·IATTIMGIPAONI
TURA: Meghalaya Civil Service Officer’s Association (MCSOA)-ni Tura-o September 8 tariko ong·atgipa annual conference tom·tome matchotangaha. Annual conference-o Meghalaya sorkarini Chief Secretary, D P Wahlang, IAS, sorkarini Principal Secretary P Sampath Kumar, IAS, Secretary, Education, Personnel & A R, Ambrose Marak, IAS aro West Garo Hills Deputy Commissioner, Jagdish Chelani, IAS iamang dongpaaha.
Conference-ko Tura-ni Tree House resort-o ong·ataha aro gipinrangni gisepo Proforma promotion-rangko man·chape somai gita gipin allied kamrangoni appoint ka·ako man·gipa officer-rangoniko administration post-ona kam doatna MCSOA-ni janapgimini gimin chanchiangaha.
Chief Guest ong·e Chief Secretary D P Wahlang, IAS tom·ao aganao, bang·a gamchatanirangni bidingo aganao MCS officer songalna orto gnanggipa kamko ka·na nangchongmota. Meghalaya Civil Service namen susaani aro ku·rachakani gnanggipa kam ong·a indake officer-rang chakchike, seng·e aro chanchianirangko chu·sokatna ka·na nangenga, ua aganaha.
Chu·sokgijanina kene chanchina kenabe aro chu·sokgipa MCS officer ong·na sakantian krengna nanga, Chief Secretary, officer-rangko didiaha.
Sorkarini mikkango MSCOA-ko donani bidingo Chief Secretary aganao, gipinrang kamrangko namatna man·engon uamangoni mitam sorkarini aganako man·enga, ua aganaha.
Ja·mano ua state civil service-ko Indian Administrative Service-ona somai gita tang·doatani gimin namedake chanchichina ua MCSOA-ko didiaha. State civil servise officer-rangko IAS-ona doatanio a·dok namen ka·sinsranga indake iako chanchina nangani kakketgipa kam ong·achim, ua aganaha.
MCSOA President aro Director, Information & Public Relations, Malthus S Sangma, MCS rimchaksoani kattako aganao jeba matchotgimin kamni a·bachengani mangrakgipa pangchakani ong·a. A·doko administration-ni pangchakaniko mangrakatna ru·utgija salo officer-rangna training-ko ong·atna manchianiko dingtangatani namgipa chin ong·a, ua aganaha. President, a·dokni administration-ko bilakbatatna officer-rangko dakchakna a·dokni ba a·songni a·paloni MCS officer-rangna training on·china de·e mesokaha.
Extra Assistant Commissioner bimingko Assistant Commisioner-ona dingtangatanina ua sorkariko mittelaha aro mikkangchi uamangni ru·uta somairangna dabianirangko chu·sokatgen ine ka·dongenga ine aganaha.
Tom·ao jemangan uamangni gamchatgipa kattarangko aganaha uamangni gisepo gipinrang Meghalaya sorkarini Principal Secretary P Sampath Kumar, IAS, aro Secretary, Education, Personnel & A R, Ambrose Marak, IAS aganaha.
