U·IATTIMGIPAONI
SHILLONG: Meghalaya a·dokona rel garirangko ra·baanichi bading chiwalani, re·a doani cholrang aro economy-koba tang·doate namroro silroroaniko tang·doatna man·gen indiba mitam manderangni gisepo rel garirangko ra·bana gita kenchakanirang dongkuenga ine Sukrobar salo, a·dokni Chief Minister Conrad K Sangma parakataha.
Khasi Hills a·jarangona rel gari ra·bana miksonganiko sorkari bon·atgnokma ma jako ra·angkugen ine sing·anina Chief Minister, ia kattarangko aganchakaha.
“Rel garirangko ra·bana kam ka·anio chinga pilakkon rimchapna nangnikenga aro darangba da·o dipet rel gari ra·baaniko dontongsrangchina aganade dongkuja,” ine ua aganaha.
India a·songni salgro salaram jolrango pilak gipin skotong songjinmarangkode rel ramarangchi nangdimatahaoba Meghalaya a·doko aro mongsongbate Khasi Hills a·jarangode rel ramarangko tarina gita man·chipkujaengachim ine nikna man·a.
Rel ramarangko tarina gita tangka paisarang indin dongaienga ine janapatengon, relni kamrangko ka·na man·ja ong·ode sorkari, ia tangka paisarangko gipin kamrangna jakkalskana man·gen ine Chief Minister parakataha.
“Gipin kamrang ine aganengon, skanggipa kamrangko chinga chipgnok ine ong·ja indiba chinga dingtang dingtang dolrang baksa agangrike ia kamko chu·sokatna jotton ka·angkugen. Rel garirangara a·dokna namgni ong·genchimoba chinga draede rel garirangko ra·bajawa,” ine Sangma aganaha.
Skanggipa Byrnihat-Shillong rel project-ni kamrangko ka·anio neng·nikanirangko bang·en chagrongna gita nangenga ine janapatengon, rel project-rangko jegalenggipa dingtang dingtang dolrangni nangnikanirangko sorkari chu·sokate on·na man·kujaenga aro apsan somoion sorkari, manderangni ra·chakna kusi ong·enggipa biaprangoba rel ramarangko tariskana jotton ka·enga ine Chief Minister parakataha.
Rel ramarangko tarianio agre somoi ra·chaengani gimin railways ministry suk ong·jaenga indiba uamang a·doko man·enggipa ra·bianirangko ma·siaha ineba ua aganaha.
“Rel garirangara manderangni namgninasa ong·ani gimin chinga ia kamo pilakkon bak ong·atna ska. Uni gimin manderangni nangnikanirangko chu·sokate ia neng·nikaniko namatchengna,” ine Sangma aganaha.
