U·IATTIMGIPAONI
TURA: Garo Hills Autonomous District Council (GHADC)-o kam ka·enggiparang, an·tangtangni dormaharangko man·gijani da·o ja 32 ong·pilengahani gimin, GHADC-o kam ka·enggiparangna da·o Krismasna skangan dormaharangko on·china dabie, Non Gazetted Employees Association (NGEA)-ni dilgiparang, a·dokni Chief Minister Conrad K Sangma-na chitti sedoataha.
Ia chittiko NGEA-ni dilgiparang, re·anggipa Sukrobar salo, a·dokni Chief Minister Conrad Sangma-ko Shillong-o grongenba on·angaha.
NGEA-ni president Brithen M Sangma-ni parakatani gitade, GHADC-o kam ka·enggipa manderang, indita jarangni dormaharangko man·tokkujaengani a·selan nokdang chalaianio neng·nikanirangko chagrongna nangtokenga aro da·o Krismasni somoirangba sepangengahani gimin nangchongmota korosrangna tangka paisarangko nangtokengaha ine nikenba, GHADC-o kam ka·enggiparangni dormahako da·o Krismasna skangan on·atchina Chief Minister-ko didiataha.
“Chinga indita jarangni dormaharangko man·tokkujaengani a·selan nokdangrangko chalaianio aro mongsongbate dedrangrangni skul aro college fee-rangkoba man·tokkujaenga aro skul fee-rangko gamna man·tokjaengani a·selan mitam skulrangode bi·sarangni result-rangko on·jana gita u·iatanirangko on·engaha. Uni gimin chingna da·o December jani gisepon Krismasna skang dormaharangko on·china chinga Chief Minister-ko mol·molataha,” ine Sangma parakataha.
Apsan daken GHADC-ko chalaienggipa Executive Committee-koba NGEA-ni dilgiparang, ta·raken GHADC-o kam ka·enggiparangni man·gni dormaharangko on·china mol·molataha.
