U·IATTIMGIPAONI
SHILLONG: Meghalaya a·doko petrol cha·ue palgiparangko aro brine palgiparangko Police-rang rim·engaha ine parakatani ja·man November 29 tarikonide Meghalaya a·dokona petrol aro diesel-rangko salbajawaha ine Sombar salo, North East Petroleum Mazdoor Union (NEPMU), ka·mikkenataniko on·atskaaha.
Iani bidingo Meghalaya a·dokni Food, Civil Supplies & Consumer Affairs-ni Minister-na sedoatengon, November 24 tarikonin Meghalaya police-rang, a·dokona petrol aro diesel salbaenggipa tanker driver-rangko ong·gija dakenga ine matnangenba rim·na a·bachengaha ine NEPMU parakataha.
“Police-rang, petrol salbagipa mitam tanker-rangko aro 22 Mile-o donggipa Dhaba-o mi cha·na neng·takgiparangko kragija dake rim·aha aro salgipinoba petrol salangenggipa mitam tanker-rangkoba maming a·sel gri police-rang rim·aha,” ine NEPMU, minister-na sedoatgipa chittio parakataha.
Meghalaya a·dokona petrol aro diesel salgipa tanker-rang re·angna kentokengaha ine janapatengon, sakoba ong·gija dakako rim·a man·ode uni kosako rakgipa ja·kurangko de·na man·a indiba iandake dos gri manderangkode sasti on·e rona nangjachim ineba union-ni dilgiparang parakataha.
“Chingni kobor man·soani gitade, police-rangni matnanganiko tanker driver jechakgenchimoba, driver-rangko kragija dake sasti on·enga aro uamangko drae ku·rachakatenba photo-rangko ka·e ra·enga,” ine NEPMU-ni dilgiparang janapatenba, ia neng·nikaniko namatkujaskalde November 29 tarikoni IOCL, BPCL aro HPCL-ni petrol aro diesel-rangko Meghalaya a·dokona salangjawa ine parakataha.
