SHILLONG: Shillong-ni Lum Survey gittimo nokrik-nokdake dongenggipa manderangni nokrangko pe·e galani gimin, Niamko an·tangtangni jako ra·gipa manderangni kosako police, mamla segataha.
Koborni manderangna aganengon, Lum Survey-ona re·angenba manderangni nok-jamrangko pe·e galanio jak donggipa manderangni kosako police, mamla segataha ine East Khasi Hills Deputy Commissioner, SC Sadhu Bristibaro aganaha.
“Niamko an·tangtangni jako ra·giparangni kosako, meli-ma·gapgipa ainrango pangchakenba raken bichal ka·gen, iano mamingdakeba nikchangani dongjawa,” Sadhu aganaha.
Hynniewtrep Youth Council (HYC) memborrang jinma tom·dakenba manderangni donggipa nokrangko pe·e galna Lum Survey-ona re·angtokaha ingipa koborko man·a joljolan police aro magistrate-rang ua biapona daariangaha ineba ua parakaha.
Ia a·selrangara jagokman·pilani ong·a aro indakgipa a·selrang mikkangchi ong·na nangja, Deputy Commissioner aganaha.
“Niamko kim·kime rakkianian an·chingni skanggipa dakgni ong·a. Unigimin darangba niam-ainko jaktango ra·jachina chinga mol·mola. Aro nanga ong·ode agangrikaniko dakenba namataniona ra·bana nanga” ineba Sadhu aganaha.
Uni aganani gitade, ia kamrangni bidingo ta·rake kamko ka·na gita altua kam ong·ja, maina ia a·arang a·dok sorkarini ong·jachim.
