TURA: Garo Hills-oba re·anggipa antirangonin salantian mikkarang waengani a·sel a·kawe jolrango chirang banengahani gimin obostarangko nina gita Sukrobar salo a·dokni Chief Minister Conrad K Sangma, Selsella-ni MLA Arbinstone Marak baksa chi banenggipa biaprangko nieaha.
Sukrobar salo a·dokni Chief Minister, West Garo Hills a·jani Silkata, Haripur aro Namabila songrangona re·ange chi banenggipa biaprangko nieaha aro chi bananichi neng·nikanirangko chagrongna nangenggipa manderangko grongjolenba nanga gita dakchakanirangko on·na ku·rachakanikoba on·angaha.
Ia songrangona re·ange chi banenggipa biaprangko niangani ja·man kobor ra·timgipa manderang baksa agangrikengon, ia jolrango chi bananirang da·o feet 5-6-mangni gita gadoangaha aro chi bananichi komibeoba 30,000 nokdangrang nangchakeaniko man·e neng·nikanirangko chagrongna nangtokenga ine Chief Minister parakataha.
“Chi banenggipa biaprango nokgri jamgri ong·gipa manderangna district administration ta·raken ja·kurangko de·e, relief camp-rangko on·aha aro neng·nikanirangko man·enggipa manderangna pilak nanga bosturangkoba on·aha. Iana anga dingtangmancha district administration-ko mittelna ska,” ine Sangma aganaha.
Da·o dipet chi bananirangchi janggi gimaanirangkode knasona man·a dongkuja ine janapatskaengon, “Chinga obostarangko name nirikkienga aro banoba maiba kenna nangani aro dakchakanirangko nangenga ong·ode chinga ta·raken ja·kurangko de·na tarisomanaha,” ine Chief Minister parakataha.
Ian ong·telaigipa a·selrangsa ong·a ine janapatengon, nangchakea man·gipa nokdangrangna pilak nanga dakchakanirangko on·china ua, district administration-na ge·etaniko on·manaha ine Chief Minister parakataha.
Batanggimin antirangonin mikkarang dontonggija waenganichi Jinjiram aro Brahmaputra chibimarang ditobae, ia jolrango chi banengahani gimin ia jolrango songdongenggipa manderang, chubatkala biaprangona katdoe dongtokengahachim aro mitamrangde district administration-ni kulie on·gipa relief camp-rango ma·chakskatokengachim.
