TURA: Adita salrangna skang, Purakhasia police outpost-ni ning·o donggipa song damsao, montol daka ine an·tangni mamatang Jengran R Marak-ko potchipenba, uni grigipa Ponibirth R Marak, so·ote galaha.
Ia a·sel ong·ani Dolbapara songo ong·aha aro iani bidingo Rohonpara songni nokma, Dolbapara songni sakgipin mande baksa re·anggipa Sombar attamni 7:10 bajimango police-rangna kobor on·eaha.
Koborko on·ani gitade, dos dakgipa Ponibirth Marak, an·tangni mamagipani nokona re·angenba, uko montol dakenga ine potchipe, chi siltongchi doke siataha. A·sel ong·ani ja·man ua, ua biaponi kate jokna jotton ka·ahachim indiba uko Rohonpara songni manderang rim·aha.
Ja·mano police-rang, uni mamagipako so·otanio jakkalgipa siltongko rim·aha aro dos dakgipa mandeko Purakhasia PHC-ona medical check-up-na rimangaha.
“Ia a·selni bidingo am·sandie man·ani gitade, dos dakgipa mande, an·tangni pagipa saengani gimin mamagipakosa montol dakenga ine potchipenba so·ote galaha,” ine police-rangni report-o parakaha.
Dos dakgipa mandeko police-rang rim·aha aro sianggipa mandeni manggisiko rate nina Tura Civil Hospital-ona ra·baaha.
Garo Hills-ni dingtang dingtang biaprangoba da·omangba mandeskako montol daka ba skal pil·a ine bebera·anirangko nikna man·engkua aro iandake chanchichipanichin dingtang dingtang songrango mandeskako so·ote galani ba songoniko a·rike galanirangko nikna man·kuenga.
