SHILLONG: Gital bilsiko maniani bak gita Meghalaya a·dokni Ri Bhoi a·jao donggipa University of Science & Technology Meghalaya (USTM), dingtangmancha jinma re·jomani, chrok mesaani, git ring·ani aro uandakgipa program-rangko ong·atangaha aro ia program-ko ong·atanio, USTM-ni samba jolo donggipa dingtang dingtang songni manderangba bak ra·angtokaha.
Ia program-ko ong·atanio, USTM-ni Chancellor Mahbubul Hoque, jinmana aganprakengon, USTM-o on·enggipa dingtang dingtang lekka pora aro bading chiwalani gita dakchakanirangko ra·china, samba jolrango donggipa dingtang dingtang songni manderangko didiangaha.
Ia jolrango namroro silroroaniko ra·bana USTM kam ka·enga ine janapatengon, University-ni wilwilao donggipa dingtang dingtang songni bi·sarangna aro chadamberangna indin lekka porako on·gen ine Hoque ku·rachakaniko on·angaha. Ia jolrango songdongenggipa manderangna bading chiwalanirango dakchakanirangko on·na gitaba ua ku·rachakangaha.
Ia program-ko ong·atanio, USTM-ni Vice Chancellor Prof GD Sharma-ba jinmana aganprakangengon, iandakgipa program-rango bak ra·paenganina jolo songdongenggipa manderangko mittelpilangenba, University aro jolo songdongenggipa manderangni bakrimanichi pilaknan namroro silroroaniko ra·bana man·gen ine Prof Sharma aganaha.
Ia program-ko jinma bi·anichi matchotataha.
