TURA: Meghalaya Teacher Eligibility Test (MTET)-o SC/ST/OBC/OST aro be·enni gita cholgri ong·gipa candidate-rangna dongimin pass mark-rangni bidingo talataniko on·china Sombar salo, All Meghalaya Minority Students Union (AMMSU), Shillong-o donggipa Educational Research & Training-ni Director-ko didie sedoataha.
Pass mark 150-oni 68 ong·gen indiba general category-nade 150-oni 90 ong·gen ine ia bilsini January 29 tariko advertisement on·gipani bidingo talataniko on·china AMMSU didiataha.
MTET-ni pass mark, Persons with Disabilities (PwDs) ba be·enni gita cholgri ong·gipa candidate-rangnade, SC/ST/OBC/OST-rangna bate komibatna nanga ine janapatengon, iani bidingo jinmana talbate u·iataniko on·china AMMSU-ni president Nur Islam, Education department-ko didiataha.
“Pass ka·ani niamko candidate-rang talbate ma·sie ra·na nangenga, uni gimin pilakni namgninan ia niamrangko talbate u·iatchina chinga nang·ko mol·molenga,” ine AMMSU-ni president parakataha.
