TURA: Tura songjinmani Na·kam Bazar jolrango bading chiwale cha·enggipa manderangoniko aro dokkan dake cha·enggiparangoniko tangka gile ra·na jotton ka·ahani gimin Sukrobar salo, West Garo Hills a·jani police-rang, mande sakbriko rim·aha.
Police-rangni u·iatani gitade, rim·ako man·gipa mande sakbri, an·tangtangko Civil Society Organisation (CSO)-ni membor-rang ine police-rangna ku·rachakaha aro ia manderangara, Baithy BN Sangma, Tengkim S Marak, Mathias T Sangma aro Tangkan Ch Sangma ong·a.
Ia manderangko, Sukrobar pringo, Na·kam Bazar jolo dokkan dake cha·enggipa manderangoniko tangka gile ra·na jotton ka·engmiting somoio rim·na man·aha ineba police-rang parakataha.
Tura songjinmani dingtang dingtang biaprango dokkan dake cha·enggiparangoniko aro bading chiwalenggiparangoniko skatang tangka dabie ra·jachina West Garo Hills a·jani District Administration, ge·etaniko on·manahachim ine nikna man·a.
Indake ong·engon, Tura Bazar jolrangonikosan ong·aigija Ringre, Araimile, Hawakhana, Chandmari aro uandakgipa dingtang dingtang biaprango dokkan dake cha·enggiparangonikoba dingtang dingtang dolrangni biming salantian tangkarangko gile ra·enga ine kobor on·timgiparang parakataha.