TURA: South Garo Hills a·jani Gasuapara Makaburipara SSA skul nokni obosta namsrangjahani a·selan kuturi ge·sao class ge·sniko ra·na nangenga ine ma·sina man·aha.
Iani bidingo A·chik Dedicated Integrity Leaders (ADIL) Gasuapara regional unit, Bristibar salo, Salantini Janera-na seachi u·iataha.
ADIL Gasuapara regional unit-ni president S Salgra G Momin-ni u·iatani gitade, ia skul noko namkalgipa kuturi ge·gipinba dongachim indiba uko babilsi dake jakkalenga indiba kuturi ge·gnide obosta namsrangjahani gimin ia kuturirango class-rangko ra·na man·jaenga ine Makaburipara SSA skulni headmistress, uamangna u·iatskaaha.
Uandaken ia skul noko classroom-rang chu·ongjae da·o kuturi ge·saon class ge·sniko ra·na nangao ga·akenga ineba skulni headmistress, ADIL-ni dilgiparangna u·iataha.
Indake ong·engon, iani bidingo ADIL Gasuapara regional unit-ni president, South Garo Hills a·jani Deputy Commissioner-ko grongenba, ia skulo poraienggipa bi·sarangni namgnina ta·raken ia skulna dakchakanirangko on·china mol·molangaha ine u·iataha. Iani bidingo ua dingtangmancha memorandum-koba Deputy Commissioner-na on·angaha.
