AMPATI: Digital-ni gita bida budiko bariatna ja·ku de·anio, Bristibar salo, South West Garo Hills a·jani dam 13 skulrango Class XI (Arts, Commerce aro Science)-ko poraienggipa sak 925 chatro chatrirangna Students Digital Learning Aid ba M-Tab-rangko sualataha.
Ia M-Tab-rangko suale on·na gita dingtangmancha program-ko Ampati-ni Deputy Commissioner (DC) Office-o donggipa DRDA Hall-o ong·atangaha aro ia program-ko ong·atanio, Mahendraganj-ni MLA Sanjay A Sangma, mongsonggipa sokgipa ong·e bak ra·angaha.
Ia program-ko Chief Minister-ni Students Digital Learning Aid (M-TAB)-ni bak gita District Administration aro Education Department nangrime ong·atangaha aro ia program-ko ong·atanio, South West Garo Hills a·jani Deputy Commissioner Hema Nayak, Additional Deputy Commissioner (ADC)-rang, Block Development Officer (BDO)-rang, School Education Officer-rang, skul principal-rang aro dingtang dingtang officer-rangba bak ra·angtokaha.
Ia tom·anio Mahendraganj-ni MLA, tom·anio bak ra·giparangna aganprakengon, ia chasongo lekka porako ra·anio gital kolrangko jakkalna nangani gimin aganangaha. Iandakgipa kolrangara, name jakkalgenchimode chatro chatrirangko chu·sokaniona ra·angna man·a indiba jakkalsretgenchimode chatro chatrirangna namgijakoba ra·bana man·a ineba Sangma aganaha.
Ia tom·anio, South West Garo Hills a·jani Deputy Commissioner Hema Nayak-ba, jinmana aganprakengon, iandakgipa kolrangko suale on·anichi lekka porako tang·doatna kam ka·engani gimin sorkariko mittelpilangaha. Chatro chatrirang porikkao chu·sokgipa ong·jagenchimoba bilsio SSLC porikkako changgni dake sena cholko on·engani gimin aro adita salrangna skang CM Impact booklet-rangko sualani giminba Deputy Commissioner janapangaha.
Ia tom·anio dongpae jinmana aganprakanggipa gipin manderangara, SEO Tapos Marak, SDSEO Emphul Marak aro gipinrang ong·a.
