SHILLONG: Sorkarini ra·gate on·enggipa dingtang dingtang scheme-rangko ra·na gita Aadhar-ko link ka·na nangchongmotgipa ong·atengani gimin Budbar salo, Awakening India Movement (AIM) Meghalaya Unit, Shillong Civil Hospital sambao donggipa U Kiang Nangbah-ni statue sepango jinma tom·e re·jomaniko ong·atangaha.
Ia tom·bimonganio AIM Meghalaya unit-ni chairman Banshai Marbaniang, jinmana aganprakengon, mandena on·gimin bilo pangchake, manderangni namgnina sorkarini ra·gate on·gipa scheme-rangko ra·na maming dakeba Aadhar card-ko nangchongmotgipa ong·atna man·ja ine parakataha.
Meghalaya a·dokni bang·a biaprangon manderangko Aadhar link ka·china draengani a·selan manderang, sorkarini on·enggipa cha·ani bosturang aro dingtang dingtang nanganirangko man·tokjaenga ineba ua aganaha.
Uamangni ia jinma tom·e re·jomaniko ong·ataniara Aadhar-ni kosakosan jegalenga ong·ja indiba manderang an·tangtangan Aadhar-na biming segatgenma segatajawa uko basena bil donganiko jinmana u·iatna miksongesa ong·ataha ineba Marbaniang aganaha.
Aadhar card-rang dongkujani a·sel bang·a chatro chatrirangan, an·tangtangni man·na nangenggipa scholarship-rangko man·tokjaengani giminba AIM-ni dilgipa suk ong·gijaniko parakataha.
Ia biapo tom·chimongani ja·man AIM-ni membor-rang Secretariat-ona re·jomange Chief Minister Conrad K Sangma-na memorandum-ko on·na jotton ka·ahachim indiba uamangko police-rang champengsoskaaha.
Chief Minister biaptango dongjani gimin ja·mani AIM-ni dilgiparang, East Khasi Hills a·jani Deputy Commissioner RM Kurbah-ni jako memorandum-ko on·angskaaha.
