SHILLONG: Meghalaya a·doko, mongsongbate Shillong songjinmao drugs ba pekatgipa samrangko jakkale watna man·gija dongenggipa manderangna indin sanna bananirangko on·na gita a·dok sorkari, Addict Treatment Facility (ATF) centre-ko New Shillong Township (NST)-ni Umsawli-o kulina tik ka·angaha.
Bristibar salo, Drug Reduction Elimination & Action Mission (DREAM)-ni tom·aniko a·dokni Social Welfare Minister Paul Lyngdoh-ni dilanichi ong·atanio, drugs ba pekatgipa samrangko jakkale watna man·gija dongenggipa manderangna indin sanna bananirangko on·na ia ATF-ko kulina tik ka·e donangaha. Ia tom·anio, a·dokni Director General of Police (DGP) Idashisha Nongrang, DREAM-ni Mission Director Francis G Kharshiing, Anti-Narcotic Task Force (ANTF)-ni Superintendent of Police (SP), DHS, Shillong Civil Hospital-ni Medical Superintendent aro gipin official-rangba dongpae bak ra·angaha.
Ia Addict Treatment Facility-ko kulina tik ka·ani bidingo kobor ra·timgiparangna talate on·angengon, drugs jakkalgipa manderangko bang·en ramarangoniko rim·na man·aha indiba Shillong songjinmani dingtang dingtang biaprango uamangko sanne banne on·na cholrang chu·onga gita dongja aro agan-ku·pattie on·anirangba dongkujani gimin iandakgipa manderangna indin sanna bananirangko on·na gita ATF-ko kulina tik ka·angaha ine a·dokni Social Welfare Minister Paul Lyngdoh parakataha.
“Batanggimin chang DREAM project-ni tom·anio tik ka·gimin gita Addict Treatment Facility-ko kulina da·al chingni tom·anio bilakbate kamrangko ka·na chanchirimangaha. Ia ATF-o chinga train ka·ako man·gipa psychiatrist-rang, palangrang, dongchakanirang aro agan-ku·pattie on·giparangba donggen. Drugs jakkale watna man·gija dongenggipa manderangna sanna bananirangko on·e songsal baksa janggi tangpiltaina rimbaanian chingni miksongani ong·enga,” ine Lyngdoh aganaha.
Umsawli-o Covid centre dongsomanahani gimin ia biapon ATF-ko kuligen ine janapatengon, ia centre-o mairang dongjachim, ua pilakkon department, nienba nangani kri on·dapanggen ine Lyngdoh parakataha.
Salgnini gisepon DREAM-ni mission director aro uni manderang, Umsawli-ona re·ange ia biapo kamrangko a·bachengna gita niegnok ine janapatengon, “Kamrang matchotahaon uamang angna report-ko on·egen indiba da·alo chingni mongsonggipa chanchianian ia ATF-ko kulina kam ka·anian ong·a,” ine Social Welfare Minister parakataha.
Sing·anirangna aganchakaniko on·angengon, ATF-ko kulina gita DREAM project-o tangkarang donga ine Lyngdoh parakataha.
“Chinga gadang gadang dake kamrangko ka·gen indiba skanggipa bako gong lak 50-70-mang koros ong·naba gnang,” ine ua aganaha.
