KHARKUTTA: Sombar pringwalni 1:30 bajimango, North Garo Hills a·jani Kharkutta jolo donggipa Mendima Chilpara songo, mande saksako, ma·sina man·gijagipa manderang silchidarechi goaha.
Kobor on·timgiparangni u·iatani gitade, goa man·gipa mandeni bimingko Biren Sangma mingachim aro ua Sombar pringwalo, su·buna ine nokoni ong·katengachim. Uni a·palona ong·katangon, ramao neng·take dongenggipa gari bolsaoni, uko silchidarechi goataha aro uni jakrani ka·bako guli nangeaha. Guli nangako man·ani ja·man ua bakan nokchina katpilangon, uko silchidarechi goattaiahachim indiba rasong gnange ia changde uko nangejaha.
Ia a·selni bidingo kobor man·soa bakan uni noksulrang aro songni manderang, uko dakchakna daribatokaha indiba dos dakgipa manderangko ua biapo nikejaha ine kobor on·timgiparang u·iataha.
A·sel ong·ani ja·man saknaa man·gipa mandeko Goalpara Solace Hospital-ona ra·angaha indiba ja·mano uko name sanna gita Guwahati hospital-ona watatskaaha.
Ia a·selni bidingo, ia mandeni ma·drangrang aro nokdangni manderang, Kharkutta police station-o FIR ka·doangaha aro police-rang, ia a·selni bidingo sandirokna a·bachengataha.
Da·o dipet iani bidingo koborrangko man·taikuja.
