SHILLONG: Assam aro Meghalaya a·dokni simarango ong·enggipa golmalrangko namatna kam ka·anio da·o dolgnini gisepo gnigipa changna agangrikengon, uan skanggipa bako gita ong·na nangja ine Voice of the People’s Party (VPP)-ni president Ardent Miller Basaiawmoit aganaha.
Basaiawmoit-ni aganani gitade, skanggipa bako a·dok damgnini gisepo agangrikaniko dakanio, golmal ong·enggipa biaprangko walni somoirangosa survey ka·aha aro a·dok damgnini gisepo songgigrikaniko bang·a manderangan chu·ongniktokjaha.
“Skanggipa bako a·dok damgnini biaprangko sualgrikanio bang·a manderangan, mongsongbate sima jolrango songdongenggipa manderang chu·ongniktokjaha. Iako chingaba raken jegala aro sima jolrango songdongenggipa manderangba jegaltokaha,” ine ua aganaha.
Skanggipa bako damdok biaprango ong·enggipa golmalrangko namatna a·dok damgnini MoU-o soi ka·grikaniko VPP ra·chakna man·jawa ineba ua aganaha.
“Chinga skanggipa bako songgrikaniko chu·ongnikja aro iako ra·chakna man·jawa,” ine VPP president parakataha.
Da·o VPP-o MLA sakbri, Lok Sabha MP saksa aro KHADC-oba Executive Committee-ko chalaiengani gimin uamang, iani bidingo a·dok sorkario sing·doanggen ineba ua aganaha.
Assam a·dokni simarang baksa meligrikna man·jaenggipa biaprangni bidingo jako ra·anian VPP-ni mongsonggipa kam ong·gen ineba Basaiawmoit parakataha.
Assam aro Meghalaya a·dok damgnini simarango ru·utbea bilsirangonin dam 12 biaprango meligrikgijanirangko nikna man·engachim indiba ia dam 12 biaprangoni damdok biaprangkode a·dok damgnini gisepo songgigrike, biaprangko sualgrikahachim. Da·o bangki dongkuenggipa damdok biaprangoba a·dok damgnini gisepo meligrikaniko ra·bana gita a·dok damgnini sorkarirang agangrikaniko a·bachengataha indiba ia agangrikanirang da·onan matchotchipskakujaengachim.
Ia a·dok damgnini simarango meligrikna man·jaenggipa biaprangko namatna ja·ku de·enggipa gnigipa bako man·chapenggipa biaprangara Langpih baksana Ri Bhoi a·jani Borduar, Nongwah-Mawtamur, Deshdoomreah, Block-II aro West Jaintia Hills-ni Block- I, Psiar – Khanduli jolrang ong·engachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·skaachim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.
