TURA: East Garo Hills a·jani Rongjeng jolrango, Jal Jeevan Mission (JJM)-ni bang·bata project-rangkon name chu·sokatjani a·sel songni nokni manderang chirangko man·jaenga ine A·chik Holistic Awakening Movement (AHAM) Rongjeng regional unit parakatenba, iani bidingo Tura-ni MP Saleng A Sangma-na badi ka·e sedoataha.
AHAM Rongjeng regional unit-ni parakatani gitade, songantion nokdang ge·antinan ringani chirangko sokate on·chinasa ia JJM-ko ma·mong sorkari ra·gate on·ahachim indiba Rongjeng jolrango, JJM-ni kamrangko name chu·sokate on·jani a·sel songni manderang chirangko man·tokjaenga.
“JJM-ni ranking-o Meghalaya a·dok nambatgipa ong·enga ine agananirangko aro songbadrango seanirangko nikna man·ronga indiba songo nokona re·ange nigenchimode obostarang bikpilsa ong·enga. Garo Hills-ni bang·bata songrangon, JJM-ni kamrangko name ka·jani a·sel chirangko man·tokjaenga aro ian ma·mong sorkarini miksongani gita ong·jaenga,” ine AHAM Rongjeng regional unit, Tura MP-na sedoatgipa chittio parakataha.
Rongjeng jolrango donggipa bang·bata songrangon JJM-ni chi tengki aro chi pipe-rangko salanirang matchotchipgija dongenga aro bang·bata songrangon kamrangko name ka·jani a·sel chirangko man·tokjaenga ineba AHAM Rongjeng regional unit parakataha.
Rongjeng jolrango JJM-ni bang·bata project-rangan tong·sa matchote aro jakkalna man·gija dongenga ine janapatengon, “Iandake kamrangko matchotgija galchipaniko niatna nangchongmotenga. JJM-ni bang·bata project-rangkon iandake matchotgija donchipengani gimin chinga baditaba chang badi ka·ahachim indiba ia kamrangko contractor-rang ba PHE department-ba matchotate on·na gisiko nangjaenga,” ine AHAM Rongjeng regional unit-ni dilgiparang parakatenba, iani bidingo kamrangko niatchina gita Tura-ni MP-ko didiataha.
Rongjeng jolo JJM-ni bang·bata project-rangan chu·sokjaenga: AHAM
Date:
Share post:
