SHILLONG: 2022 bilsini bon·angachibara, a·dokni gitcham Chief Minister Mukul Sangma aro gipin MLA-rang baksa Congress dolko wate Trinamool Congress (TMC)-o napanggipa Salmanpara constituency-ni gitcham MLA Winnerson D Sangma-ba da·o Congress dolona re·bapilna siengaha aro ian Congress dolko bilakbatattaiani ong·enga.
Salmanpara-ni gitcham MLA Winnerson D Sangma, 2022 bilsio Congress doloni ong·katenba, 2023 bilsini Assembly election-o TMC-ni tikitchi susaahachim indiba chu·sokgipa ong·na man·jaha.
Re·anggipa October 29 tarikosan, a·dokni gitcham Minister aro Rangsakona-ni gitcham MLA Zenith M Sangma-ba TMC-ko wate Congress dolona re·bapilaha aro da·o TMC-o napanggipa bang·bata membor-rangan, Congress dolona re·bapilna nidingtokengaha.
Kobor on·timgiparangni u·iatani gitade, Salmanpara-ni gitcham MLA Winnerson D Sangma-ko, re·baenggipa November-ni 26 tariko, Rangsakona-o Congress dolni tom·bimonganiko ong·atanio, party-ona rimchaksonaba gnang. Re·baenggipa 2026 bilsio ong·atna sienggipa GHADC election-o ua Congress doloni susana gita party tikitna dorgasto galenga ine kobor on·timgiparang parakataha.
Koborko on·ani gitade, Zenith M Sangma-ni jikgipa Sadhiarani M Sangma-ba apsan salon Congress dolo napangnaba gnang.
Indake ong·engon, South Tura-ni gitcham MLA John Leslee K Sangma-koba Congress dolona rimbapilna gita party-ni dilgiparang agangrikenga ine kobor on·timgiparang parakataha.
Adita salrangni gisepon John Leslee Sangma, Meghalaya Pradesh Congress Committee (MPCC)-ni president Vincent Pala-ko gronge agangriknaba gnang.
