TURA: Garo Hills Autonomous District Council (GHADC)-ni saksakamkam me·chik MDC aro Trinamool Congress (TMC)-ni dilgipa Sadhiarani M Sangma, re·baenggipa November-ni 27 tariko, Congress dolo napangna sienga ine kobor on·timgiparang parakataha.
Kobor on·timgiparangni u·iatani gitade, November-ni 26 tariko, TMC aro dingtang dingtang party-ni dilgiparangko aro membor-rangko Congress dolona rimchaksona sienga aro uni ja·man salgipino Dengnakpara-ni MDC Sadhiarani Sangma-koba party-ona rimchaksona sienga.
TMC-ni bang·bata MDC-rangan, re·baenggipa 2026 bilsini GHADC election-o TMC-ni tikitchi susana nangniktokjaenga aro apsan daken Sadhiarani Sangma-ba Congress dolni tikitchi susaskana miksongenga ine kobor on·timgiparang parakataha. Indake ong·genchimoba ia dilgiparang, TMC-ni dilgipa aro a·dokni gitcham Chief Minister Dr Mukul Sangma-ni u·iatanina sengtokkuenga ineba kobor on·timgiparang parakataha.
November-ni 26 aro 27 tarikrango Congress dolni tom·aniko ong·atanio, AICC-ni secretary aro Meghalaya in-charge A Chellakumar, Meghalaya Pradesh Congress Committee (MPCC)-ni president Vincent Pala, Tura-ni MP Saleng A Sangma, MPCC-ni working president Deborah C Marak, adita salrangna skang Congress-ona re·bapilgipa aro a·dokni gitcham minister Zenith Sangma baksana gipin dilgiparangba bak ra·anggen ine kobor on·aha.
GHADC election-ko re·baenggipa 2026 bilsini a·bachengachibara ong·atna siengani gimin Congress dol, da·o an·tangtangko bilakatpiltaina man·engaha maina batanggimin sal somoirangonin, party-ko wate katgipa dilgiparang aro gipin party-ni dilgiparangba Congress dolona re·bapiltokaha.
Zenith Sangma-ni Congress dolo napangpilani ja·man, South Tura-ni gitcham MLA John Leslee K Sangma-ba adita salrangna skangsan Congress dolo napangpilaha aro da·o GHADC-ni saksakamkam me·chik MDC Sadhiarani M Sangma-ba Congress dolo napangpilna siengaha.
Ia apsan salon, Salmanpara constituency-ni gitcham MLA aro TMC-ni dilgipa Winnerson D Sangma-ba Congress dolo napangnaba gnang ine kobor on·timgiparang parakataha.
Kobor on·ani gitade, GHADC-ni dam 29 constituency-o susana gita da·o dipet gimik sak 67-na baten candidate-rang, party tikitna dorgasto galmanaha.
