TURA: Garo Hills Autonomous District Council (GHADC)-na dingtang electoral roll-ko tarina nangengani gimin A·chik State People’s Front (ASPF), a·dokni Governor CH Vijayashankar-na sedoataha.
ASPF-ni Governor-na sedoatani gitade, GHADC-ko a·bachengaonin ian A·chikrangni nangani, bilrang, daka rikanirang aro niamrangko chel·chakbaenggipa bimangsa ong·ani gimin ia bimango Tribal ong·gijagipa manderangni bak ra·paaniara kragijani aro niamni a·palo ong·enga.
“GHADC-na Sixth Schedule-ni ning·o on·gimin bil gita ia bimangko chalaianio Scheduled Tribe (ST) jatrangonin ong·na nanga maina ia miksonganiosa GHADC-ko A·chik jatna on·aha,” ine ASPF parakatenba, GHADC-na dingtang electoral roll-ko tarianio kamrangko niatchina gita a·dokni Governor-ko didiataha.
Somoi gita ja·ku de·anichisan Sixth Schedule-ni miksonganirangko ripingna gita man·aigen ine janapatskaengon, GHADC-na dingtang electoral roll-ko tarianiara niamosan ong·enga ong·ja indiba District Council-ni miksonganiko rakkina gita nangchongmotgipaba ong·enga ine ASPF parakataha.
A·dokni Governor-an a·doko songdongenggipa Tribal manderangko aro uamangni bilrangko chel·chakgipa gita ong·a ine janapatengon, mikkangchi GHADC-ko aro GHADC-ni ning·o songdongenggipa Tribal manderangko chel·chakna gita ja·kurangko de·china ASPF, a·dokni Governor-ko didiataha.
