TURA: Garo Hills Autonomous District Council (GHADC)-ko chalaianio, legislature, executive aro judiciary-ni bilrango dingtanggrikanirang dongkujani gimin sandirokaniko dakchina gita Meghalaya High Court ge·etaniko on·angaha.
Social activist-rangoni saksa Flaming B Marak, Meghalaya High Court-o badi ka·doani ja·man, GHADC-ko chalaianio legislature, executive aro judiciary-ni bilrango dingtanggrikani dongkujani gimin sandirokchina High Court ge·etaniko on·angaha. High Court-o Flaming Marak-ni pal, ukil PT Sangma mikkangpaenga.
“District Council-o bilrangko ma·ekgrikataniara namen nangchongmotgipa ong·a aro iani bidingo badi ka·gipa namen nangchongmotgipa bichongkon ka·aha. A·songni niam bidikon, legislature, executive aro judiciary-ni gisepo bilrang dingtanggrikna nanga ine ge·etaha. Badi ka·gipa mandena General Administration Department-ni Public Information Officer-ni aganchakani gitade, Executive Committee-ni Secretary aro District Council Court, Tura-ni Judge-ba apsan mandean ong·a,” ine High Court parakataha.
GHADC-ko chalaianio, legislature, executive aro judiciary-na on·gimin bilrangni bidingo Flaming Marak, RTI ka·enba, iako ma·sina man·aha.
“Executive Committee-ni Secretary-an District Council Court-ni acting Judge dake kamko ka·enga ine ma·sina man·aha aro ian GHADC-o legislature, executive aro judiciary-ni gisepo dingtanggrikani dongkuja ine mesokaniba ong·aha. Ian Garo Hills Autonomous District (Administration of Justice) Rules, 1953-ni Rule 10 aro 11-ni kosako re·ani gita ong·enga,” ine Meghalaya High Court parakataha.
Koborko on·ani gitade, GHADC-o Executive Committee-ni Secretary SRR Marak, 2023 bilsini August 30 tarikonin District Council Court-ni judge-naba songako man·ahachim.
District Council Court-ni Additional Judge-ko songchina gita a·dok sorkariko didiatengon, da·o dipet SRR Marak-an, Council Court-ko name chalaina gita Additional Judge-ni kamko ka·angchengkugen ine High Court parakataha.
Iani bidingo 2026 bilsini January 28 tariko hearing dakangtaigen ineba High Court parakataha.
GHADC-o legislature, executive aro judiciary-ko apsan chalaienganina HC sing·doa
Date:
Share post:
