TURA: Jisu Kristoni atchiani sal ba Krismas salko manisamsoani bak gita Bristibar attamo, Tura-ni Wadanang Baptist Mondolini gilja noko, Candle Light Service ba mombatirangko so·e jinma olakkiani program-ko ong·atangaha.
Ia Candle Light Service-ko Sastroni Johan 12:46 ‘Seng·a a·gilsakona re·baa’ ine pangchakaniko done ong·atangaha aro ia olakkianio, Dopanang Bipekoni Pamong Lukhi B Marak, donsogimin sastroni bako pangchake, Isolni namgipa kattarangko aganprakangaha.
‘Seng·a a·gilsakona re·baa’ katta bichongni gimin talataniko on·angengon, ian salo teng·gipa salko miksongja, walo teng·enggipa light-rangko miksongja indiba seng·aniara Jisu Kristo an·tangkon miksonga ine Pamong Lukhi aganaha.
Ia kattarangko sana aganengachim inode uan Jihudirangna, Parisirangna aro Pamongrangna aganenga ine nikna man·a ineba Pamong Lukhi aganaha.
Ia Candle Light Service-ko ong·atanio, jinma mombatirangko so·e, Krismasni dingtang dingtang gitrangko ring·anichi Nokgipa Isolna rasongko on·an baksana Jisu Kristoni atchianikoba aganprakangtokaha.
