Inquiry report-na sengkuenga ine DC a·kanga
RESUBELPARA: North Garo Hills a·jani Wageasi songo niam gri Garo Hills Autonomous District Council (GHADC)-ni weighbridge-ko chalaienga ine antisamangna skangan badi ka·ahaoba, ia weighbridge-ko chipatna gita maming ja·kurangko de·jaengani gimin social activist Nilbath Ch Marak, District Administration aro Police department-o sing·doataha.
National Highway (NH-62) rama gita re·ruraenggipa garirangoniko, GHADC aro Forest Department, Wageasi-o niam gri weighbridge-ko kulienba tangka gile ra·enga ine adita salrangna skangsan, Nilbath Ch Marak, North Garo Hills a·jani Deputy Commissioner aro Superintendent of Police (SP)-na badi ka·doatahachim.
“National Highway ramarango GHADC-de weighbridge-rangko chalaina niam dongja ine niam donggenchimoba, maini gimin ia weighbridge-ko chipatna gita district administration, somoiko ra·chana nangkuenga? Ia weighbridge-o truck garirang napjaengoba, maming receipt gri, gari bolprakonikon gong 2000 ka·e gile ra·enga, indide ian ong·gija kamko ka·enga ong·jama?” ine Nilbath sing·doataha.
Ia biapo niam gri weighbridge-ko kulie tangka paisarangko gile ra·engani a·sel ma·manti bosturangko salgipa garirang, bading chiwalgiparang aro ramram manderangba neng·nikanirangko chagrongna nangtokenga ine DC aro SP-na badi ka·doatgipa chittio Marak parakatahachim.
“Nangchakea man·gipa manderangni badi ka·anirangko man·soani ja·man aro an·tangba iani bidingo am·sandianirangko dakon, rama gita bostu salruragipa garirang, a·dok sorkarina kajinarangko gamani ja·manba, ia biapo tangka paisarangko gamna nangkuenga ine ma·sina man·aha,” ine Marak parakataha.
Ia rama gita ma·manti bosturangko salruragipa garirang, kajinarangko gamengoba, ia biapo niam gri weighbridge-ko kulie, garirangoniko tangka gile ra·enga ineba Marak matnangataha.
Marak-ni parakatani gitade, niamo pangchake a·dok sorkarini Transport department, PWD ba Industries department-rangsan weighbridge-rangko chalaina bil donga indiba GHADC-ni weighbridge-ko chalaianide niamni a·palo ong·a.
“GHADC-ara Sixth Schedule Autonomous District Council ong·e, tangka paisarangko gile ra·na ba commercial garirangna weighbridge-ko chalaina bil dongja indiba Sixth Schedule-ni ning·osan bilrangko man·aia. Uni gimin GHADC Forest official-rangni weighbridge-ko chalaianiara niamni a·palo ong·a aro ta·raken champengatako man·na nanga,” ine Marak parakataha.
Ia weighbridge-o gari driver-rang tangka gamna jechakode, uamangko watninggija sengate donronga aro iani a·selan garirangko salanio noksan ong·na nangenga aro bosturangba somoi gita sokrongjaenga ineba Marak matnangataha.
Iani bidingo sing·sandiaton, ia weighbridge-ni gimin inquiry-ko dakna a·bachengataha aro da·o ua inquiry report-na sengengkua ine North Garo Hills a·jani Deputy Commissioner Abhishek Saini parakatskaaha.
