TURA: East Garo Hills a·jani Songsak police station-ni ning·o donggipa Koksi Songma songo, niam gri ro·ong quarry aro ro·ong jetani karkanako chalaiengani a·sel samtangtango ong·telaigiparangna aro jolo songdongenggipa manderangna nangchakeaniko ra·baenga ine A·chik State People’s Front (ASPF), a·dokni Chief Minister Conrad K Sangma-na badi ka·doatenba, ia biapo niam gri chalaienggipa quarry aro ro·ong jetani karkanako chipatchina gita didiataha.
ASPF-ni Chief Minister-na sedoatgipa chittio parakatani gitade, Koksi Songma songo, niam gri ro·ong quarry aro ro·ong jetani karkanarangko chalaienga ine ia jolrango donggipa dam 11 songni sordarrang, uamangna badi ka·e sedoatani ja·man, uamang an·tangtangan ia songona re·ange nion, ia jolrango ro·ongrangko bikotengani a·sel, samba jolrango donggipa buring bolgrim aro chiring chibisikrangna nangchakeaniko ra·baenga ine nikna man·aha.
“Ia songo, niam gri ro·ongrangko bikotengani a·selan ia biap gita jokenggipa Chiwate chiring nosto ka·ako man·engaha aro ia chiringo pangchake janggi tangenggipa dingtang dingtang songni manderang, neng·nikanirangko chagrongna nangtokengaha. Ia ro·ong quarry aro ro·ong jetani karkanaona dal·dalgipa truck garirang re·ruraengani a·selba, ia songo gital tarigipa PMGSY ramarang nosto ka·ako man·engaha aro ian ja·achi re·ruaenggipa manderangna, mongsongbate skulrangchi re·enggipa bi·sarangnaba kenchakna nangani ong·enga,” ine ASPF-ni dilgiparang parakataha.
Ia biapo ro·ong quarry-ko chalaiengani gimin nangchongmotgipa lekkarangko mesokchina bi·on, East Garo Hills Deputy Commissioner-ni Premsons Motors Private Limited (PMPL)-na on·gipa lekkakosan mesokna man·aiaha ineba ASPF parakataha aro maikai ia biapo ro·ong quarry-ko chalaina gita name inquiry-rangko dakchenggija NOC-ko on·na man·aha ine sing·doataha.
Ia biapo ro·ong quarry aro ro·ong jetani karkanarangko chalaiengani a·sel buring bolgrimrang nosto ka·ako man·enga, a·arang ruronge jolo songdongenggipa manderangna kenchakna nangani ong·enga, balwa aro chiring chibisikrang moila ong·atako man·enga aro dal·dalgipa kolrangko jakkalengani a·sel nangana bate gam·atanirangchi manderang aro matburingrang neng·nikanirangko man·na nangenga ine janapatengon, ia biapo ro·ong quarry aro ro·ong jetani karkanarangko chalaienggipani bidingo ta·raken inquiry-ko dakchina aro lekkarangko name nichina gita ASPF didiataha.
