WILLIAMNAGAR: Re·anggipa Bristibar attamo, tanggitik saaniko man·e sianggipa Shillong-ni Lok Sabha MP Ricky AJ Syngkon-na Meghalaya Pradesh Youth Congress (MPYC)-ni membor-rang, Esat Garo Hills a·jani Williamnagar-o jinma kalime tom·aniko ong·atangaha.
Ia tom·aniko MPYC-ni president Timjim K Momin dilangengon, Shillong-ni MP Ricky AJ Syngkon-ni tanggitik a·gilsakko watangahani gimin suk ong·gijaniko parakangaha aro sianggipa mandeni nokdangna, kalimpaanikoba parakangaha.
Shillong MP-ni sianganiara Meghalaya a·dokni manderangna dal·bee gimaani ong·aha ine janapatengon, ian ku·cholsan ong·ani, uni kamrangko nipilani aro jinma apsan bi·ani somoi ong·enga ine Momin parakataha.
Ia tom·bimonganio, Indian Youth Congress-ni general secretary Tarh Johny, Manipur Pradesh Youth Congress-ni president Anand Wahengbam, Meghalaya Pradesh Congress Committee-ni working president Deborah C Marak, a·dokni gitcham Minister Zenith Sangma aro party-ni dingtang dingtang dilgiparang aro kam ka·giparangba dongpae bak ra·angtokaha.
Ia tom·anio sianggipa Shillong MP-na mande ra·pilskaani aro bi·chakani chin gita dikdiksa somoirangna jinma jrip donganikoba dakangaha.
Shillong MP-ni sianina kalimpaaniko mesokna aro una mande ra·pilskaaniko mesokna gita MPYC-ni ong·atna manchisogimin car rally-ko dontongatpilaha ineba MPYC-ni president parakataha.
