SHILLONG: Garo Hills Autonomous District Council (GHADC) election-o Tribal ong·gijagipa manderangni bak ra·paaniko jegale Garo Hills-o so·sojengjeng ong·aniko nikna man·engahani gimin Khasi Hills Autonomous District Council (KHADC) election-oba Tribal ong·gijagipa manderang, dilgipako seokna aro susana man·jana gita District Council Rules-ko taridapchina Khun Hynniewtrep National Awakening Movement (KHNAM), KHADC-ko didiataha.
Iani bidingo, KHADC-ni Chief Executive Membor (CEM) Winston Tony Lyngdoh-na sedoatengon, 2025 bilsini April jao aro 2026 bilsini January jaoba, 1951 Assam & Meghalaya Autonomous District Rules-ni Rule 128(1) aro Rule 128(3)-ko taridapchina KHNAM dabiahachim indiba batanggimin somoirango KHADC-ni Executive Committee (EC)-rang maming ja·kurangko de·chipjaha ine KHNAM-ni working president Thomas Passah parakataha.
“2014 bilsionin chinga dingtang dingtang EC-rangko iani bidingo mol·molahachim indiba uamang pilakan iana gisik nangjaha aro ku·rangko on·tokjaha,” ine Passah parakataha.
GHADC election-na Tribal ong·gijagipa manderangba nomination-rangko file ka·na man·engani gimin janapatengon, ian District Council-ni mongsongbatgipa niamrangko MDC-rang mangrakbatatna gisik nangjahani a·selsa ong·a ine KHNAM parakataha.
KHADC election-o Khasi ong·gijagipa manderangni bak ra·paaniko champengna gita KHNAM-ni segimin niamrangkoba KHADC-ni CEM-na on·ataha.
“Garo Hills-o ong·enggipa obostarangan na·simangko mikkangchina chanchisona draatnaba gnang,” ine Passah janapatenba, ia niamko ta·raken Governor ra·chakna gita ja·kuko de·china KHADC-ni EC-ko didiataha.
