TURA: Dingtang dingtang jatrangni gisepo ku·mong nangrimaniko rakkina gita Indian Constitution-ni ning·o Tribal-rangna on·gimin Sixth Schedule-ko mande ra·china, South Garo Hills a·jani social activist Greneth M Sangma, Tribal ong·gijagipa jatni manderangko dilenggipa, chong·motan Rajabala MLA Mizanur Rahman Kazi, gitcham MDC Sofior Rahman, gitcham MLA SG Esmatur Mominin aro gipin dilgiparangko seachi didiataha.
Garo Hills Autonomous District Council (GHADC)-ni bidingo aro social media-rango ra·bigrikanirangchi jatgnini gisepo ding·chaogrike so·sojengjeng ong·engani gimin ua ia chittiko uamangna seatenga ine Sangma parakataha.
Jatko dilgiparang ong·e, tom·tomaniko rakkiani aro chadamberangko ding·chaoatgipa kattarangoniko chel·e rakkianiara uamangni daitoan ong·a ine janapatengon, Article 244(2)-ni ning·o dongimin niam gita GHADC-ara general administrative body ong·ja indiba ian Indian Constitution-ni Article 244(2)-ni ning·o ain gita songgimin bimang aro Sixth Schedule-chi chalaigipa bimangsa ong·a ine Sangma talataniko on·angaha.
“GHADC-ara Tribal A·chik manderangni a·a-chia, daka rikani aro songko nokko chalaiani bewalrangko rakkina ba chel·chakna on·gimin bimangsa ong·a. GHADC election-o susana gita candidate-rang Scheduled Tribe (ST) certificate-ko nangtelgen ine dongimin niamko ra·biani ba jegalaniara, Constitution-ni ning·o Tribal-rangna a·songtango chel·chakna on·gimin niamrangko ba bilko ra·sekna jotton ka·anisa ong·a,” ine Sangma parakataha.
Tribal-rangna on·gimin bilrangko Sofior Rahman aro gipin dilgiparangni social media-rango ra·bipangpilaniko nikna man·a ine janapatengon, iandake social media-rango dinggrikaniara namen kenbegnigipa ong·a aro ding·chaoataniko ra·bana man·gipa ong·a ine Sangma parakataha.
“Hai an·ching seng·ani ramako re·na aro A·chikrangna on·gimin bilrangko mande ra·e, jattangko tom·tomaona re·dilchina chinga na·simangko didienga. Na·simang Tribal-ni kamrango ku·rang on·gija Sixth Schedule-ko mande ra·genchimode an·ching mamingnan kengija songsul noksul gita janggi tangna man·aigen,” ine Sangma parakataha.
