Athiabari: West Khasi Hills-ni Aradonga jolo niamgri bol ratengani (saw mills) gimin matnanganirangko man·a ja·man A·chik Holistci Awakening Movement (AHAM), Association for Democratic Empowerment (ADE) Aradonga Regional Unit bakrime Social Forestry aro Territorial Departments-oni Riangdo Range Officer aro Athiabari-ni Officer-in-Charge baksa nirokangaha.
Athiabari Police Outpost-ni sipairang baksa melie am·sandianiko dakangaha.
Ua jolo niamgri bol rate palengako aro furniture-ni unit-rangko chalaiengani bidingo changni chang badi ka·aniko man·e am·sandianiko dakna re·angaha. Daitoko jako ra·gipa authorities-oniko maming ra·chakani donggijan niamgri unit-rangko chalaienga, iarang wilwilao dongenggipa jolrangni buring-bolgrimrangko bon·atenga ine matnangaha.
Am·sandianiko dakangaon operation ka·anggipa unit, potchipgipa unit-rangko niangaon bang·a operator-rangan legal document, permit aro clearance ba uandakgipa lekka pancharang donggijaniko nikna man·aha.
Niamrangko pe·anina daitoko jako ra·gipa department, jolan ja·ku de·enba ge 5 niamgri bol ratenggipa unit-rangko (sawmill, furniture unit) chipataha.
Authorities, jolni buring-bolgrimrangko aro gamrangko ripingangna on·kange kam ka·aniko mesokangaha. Mikkangchiba niamgri iandakgipa unit-rangko chalaigiparangko rim·a man·ode niamo pangchake ja·ku de·na mikrakataha.
Iarangni gisepon CSO, jolni manderangko iandakgipa niamgri kam ka·anirangko nikangkua ong·ode jolan authorities-na u·aitchina didiaha.
