Sorkari kamrangna bate poraia skiani nongchongmotgipa ong·a: Tynsong

SHILLONG: A·gilsak gimiko dondipgija dingtanganirango poraia skianian mongsonggipa ong·e dal·roroenga, ma·gipa pagiparang uamangni bi·sarangko poraianio skanggipa gisik nangchina didina aro sorkari kamrang bang·ja ine gisik satjachina Sukrobar salo  Deputy Chief Minister Prestone Tynsong mol·molangaha.
Lairlyngkot-o St. Peter’s Higher Secondary School-ni diamond jubilee manianiko oprakani somoio, ua chasong gitalo chu·sokanina aro an·tangtang kamrangko ong·katatgiparangna u·iani aro changa sapanirang pangchakani ong·e dongkama ine ua aganaha.
Sorkari kamrangko man·a nengengaha ine ma·a paarang uamang an·tangtangni bi·sarangko indin poraiatenga ine chanchia indiba indake ong·ja aro indakgipa chanchigiparangni kosako ua mikrate aganaha. Poraia skie ra·aniara kam man·asan ong·ja iana bate re·mikkangna man·a aro an·tangna aro songsalna namgniko ra·bana bilakgipa kamrangko ka·na man·a ine Tynsong agandapangaha.
“Poraia skia man·ani gride an·ching an·tangtangni ja·ao chadengna darangan neng·nika. Aro ia chasongo u·i ma·siani gamchatgipa ong·ja ian nangchongmotgipasa ong·a,” ine ua aganaha. Sector ge·antion chadamberangna cholrangko ong·katatna sorkari gisiko nange kamrangko ka·enga ine ua agandapangaha.
Kam gri ong·e dongenggipa an·chingni chadamberangko dakchakna dingtang dingtang sorkari scheme-rang donga aro programme-rang donga, uamangna changa sapaniko skie on·a, cholrangko on·angna aro an·tangtang janggi tangna cholrangko bikotna skie on·angani ong·a ine ua janapangaha.
Ia ja·ku de·anirangara, economic-ko bilakdapatna aro re·baenggipa chasongrangonaba man·gni ong·atna poraia skianiko dingtangatna miksonge bikotataha, ine ua aganaha.
Institution-ni chu·sokanina aro dal·roroenganina Sohra-ni MLA Gavin Miquel Mylliem an·tangni chu·ongnikaniko tom·bagiparangna aganangaha.
Shillong Diocese-ni Archbishop, Victor Lyngdoh; Pynursla local MDC, Shemborlang Rynjah; school principal, Fr Kyrshan Kharpuri; community dilgiparang, sorkari official-rang, chatro chatrirang aro ma·a paarang programme-o dongpaaha.  Programme-o chatro chatrirangchi jatni chrok mesaanirangko dakangaha.
Jubille-ko maniani somoio institution-ko bilakdapatna sorkarioni tangka lak 20-ko on·e dakchakna Tynsong parakataha.