SHILLONG: Shillong Parliamentary by-election-o susana gita komibeoba sakbri ma sakbonga dilgiparang, Bharatiya Janata Party (BJP) tikitna dorgasto galaha ine kobor on·aha.
Re·anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man·e siangani ja·man da·o Shillong Parliamentary Constituency-ni by-election-ko ong·atna nangengachim ine nikna man·a.
Koborko on·ani gitade, Shillong Parliamentary by-election-o BJP-ni tikitchi susana gita BJP-ni state spokesperson Mariahom Kharkrang, gitcham state president Ernest Mawrie aro Jaintia Hills-ni adita sak dilgiparangba dorgastoko galaha.
Iani bidingo sing·sandiaton, ia chang Shillong Lok Sabha by-election-o BJP-ni dilgiparang candidate-ko susaatna nangnikenga indiba candidate-ko seokanide ma·mongni dilgiparangosa pangchakaigen ine BJP-na ku·wattimgipa M Kharkrang parakataha.
“Chingni party-ara national party-sa ong·ani gimin pilak kamrangon ma·mongni dilgiparangosa pangchakna nangaia,” ine ua aganaha.
Ia by-election-o a·dokni dilgiparang, National People’s Party (NPP) baksa bakrimgija an·tangarisa susana nangnikbattokenga ineba Kharkrang aganaha.
“Chinga chingni worker-rang aro membor-rangni giminba chanchina nanga. Uamangba, dingtang miksongani donggipa dingtang party-na kam ka·ana bate an·tangtangni party-nasa kamko ka·na nangnikbata,” ine ua aganaha.
2024 bilsini Parliamentary election-ode BJP, Shillong aro Tura Lok Sabha constituency damgnion susagija, NPP-ni candidate-rangna chakpaaniko on·skaahachim ine nikna man·a.
Indake ong·genchimoba 2024 bilsio, Shillong Lok Sabha seat-ko Voice of the People’s Party (VPP) aro Tura seat-ko Congress cheskaahachim.
Shillong LS by-poll-na adita sak dilgiparang BJP tikitna dorgasto gala
Date:
Share post:
