KHARKUTTA: Kharkutta C&RD Block-ni ning·o donggipa bang·a songrangon komibeoba dam 35 community sanitary complex (CSC)-rangko rikna gita niam gri tangkarangko sanction ka·a ine matnangenba, Kharkutta jolo songdongenggipa adita sak manderang, Meghalaya Lokayukta-o badi ka·doangaha.
Public toilet damprakko gong lak 3 ka·e rikna gita dam 35 CSC-rangkon saksa Visionstar N Arengh minggipa contractor-na on·e, ia order-o North Garo Hills a·jani Deputy Commissioner Abhishek Saini, re·anggipa March jani 9 tariko soi ka·aha aro apsan salon, gong lak 52.5-ni advance tangkarangko ia contractor-ni account-o chipataha ine badi ka·gipa manderang matnangataha.
“Tangkarangko Village Water & Sanitation Committee (VWSC)-ni joint account-ona chipatani pal contractor-ni account-onasa chipataha aro ian India sorkarini on·gimin niamrangko pe·ani ong·enga,” ine badi ka·gipa manderang parakataha.
Swachh Bharat Mission (Gramin) 2014-o dongimin niamrang gitade, Gram Panchayat (GP)-ni VWSC dolpraknan dingtang account-ko kulina nanga aro Gram Panchayat-ni ‘Separation/Pradhan’-ba VWSC-ni chairperson-sa ong·na nangani gimin Swachh Bharat-ni tangkarangko VWSC/GP-ni account gitasa watna nangachim ine badi ka·giparang talataniko on·angaha.
“Indiba ianode, VWSC-ni membor ong·gijagipa ba president/secretary ong·gijagipa mandeni account-onasa DC, tangkarangko chipatskaaha. Ia songrango toilet-rangko rikna chamgipa tangkarangko contractor-ni account-o chipataniara niamni a·palo ong·a,” ine Kharkutta-ni adita sak manderang, badi ka·doangaha.
SBM-ni tangkako contractor-ni account-o chipatanina Lokayukta-o badi ka·a
Date:
Share post:
