TURA: Garo Hills-o so·sojengjeng ong·anina a·dok sorkarini ra·doatgipa Garo Hills Autonomous District Council (GHADC) election-ko ta·rake ong·atchina GHADC election-o Trinamool Congress (TMC)-ni candidate ong·e susaenggipa manderang dabiangaha.
Iani bidingo TMC-ni candidate-rang Bristibar salo, Tura-ni TMC office-o tom·aniko ong·atangenba, GHADC-ni bidingo aro election-ko ong·atninggija donengani gimin chanchirimangaha.
Ia tom·anio TMC candidate-rang tom·e chanchirimengon, Tribal-rangna on·gimin bilrangko chel·chakna nangengani gimin aro GHADC election-ko ra·dodapgija ta·raken ong·atchina dabiangaha.
GHADC election-o susagiparangna Scheduled Tribe (ST) certificate-ko nangtelgipa ong·atanina mittelpilaniko parakatengon, ian ru·uta bilsirangoni A·chikrangni dabienggipa ong·a aro ia niamko ra·gatanichi, District Council-ko A·chik jatni namgnina kam ka·gipa bimang dake rakkina man·gnok ine TMC candidate-rang parakataha.
Assam and Meghalaya Autonomous Districts (Constitution of District Councils) Rules, 1951-ko taridapenba, ‘Garo Hills Autonomous District Amendment Rules, 2026’-ko ra·gatchina gitaba TMC candidate-rang dabiangaha.
Garo Hills-o so·sojengjeng ong·ahani giminsa April-ni 10 tariko ong·atna manchigimin GHADC election-ko ra·doatna nangaha ine janapatengon, GHADC-na dingtang electoral roll-ko tarina aro constituency-rangko sualpiltaianio jadok somoikode nangjawa ine TMC candidate-rang, GHADC election-ko una skangan ong·atchina sorkario dabiangaha.
TMC aro Opposition dolni dilgipa Dr Mukul Sangma-ni pilak MDC-rangna u·iatanio pangchake, GHADC-ni session-o taridapgimin niamrangko ra·chakahaon, GHADC election-ko joljol ong·atna nanga ine TMC candidate-rang, a·dok sorkariko didiataha.
