TURA: West aro South West Garo Hills a·jao niam gri napsrukbae songdong a·chaenggipa manderang batroroenga ine Garo Students Union (GSU) parakatenba, niam gri napsrukbae songdong a·chaenggipa manderangko sandirokna gita Meghalaya Residents Safety & Security Act (MRSSA) 2016-ko ra·gate ja·rikchina a·dok sorkariko didiataha.
“Garo Hills-o, mongsongbate West aro South West Garo Hills a·jao, Bangladesh a·songoni niam gri napsrukbae songdong a·chaenggipa manderang batroroenga ine chinga bang·en badi ka·anirangko man·soaha. West Garo Hills aro South West Garo Hills a·jao niam gri napsrukbae songdong a·chaenggipa manderang batrorobaengani a·selan ia jolrango songdongenggipa Tribal manderangna kenchakna nangani aro Tribal-rangni a·a chiarangko rakkianio nangchakeaniko man·engaha. Iandake gipin biaprangoni re·napbae songdong a·chaenggipa manderangko sandirokna gita cholrang dongjani a·selan District Administration aro police-rangna namen neng·beani kam ong·enga. Uni gimin niam gri songdong a·chaenggipa manderangko sandirokna man·na gita MRSSA 2016-ko ja·rikchina chinga didienga,” ine GSU-ni president Zikku Balgra N Marak, a·dokni Chief Minister Conrad K Sangma-na sedoatgipa chittio parakataha.
MRSSA-ni ning·o Meghalaya a·dok gimikon District Task Force, Facilitation Centre-rangko kulina aro nok para ra·e dongenggipa manderangko sandirokna niamrangko on·manaha ine janapatengon, West Garo Hills aro South West Garo Hills a·jarango Tribal manderangko chel·chakna aro tom·tomaniko rakkina gita MRSSA-ko ra·gate ja·rikna nangchongmotenga ine GSU parakataha.
Niam gri songdong a·chaenggipa manderangko sandirokna gita special verification drive-rangko ong·atchina aro niamrangko rakbatatchina gitaba GSU, a·dokni Chief Minister-ko didiataha.
