Nokdang ge·saon sak 176 pu·ongiparang donga ine nikna man·a
PHULBARI: West Garo Hills a·jani a·kawe jolrango manderangni jelbra jelsuani batroroengani gimin Garo Students Union (GSU) Phulbari regional unit-ni membor-rang, Phulbari constituency-mangmangni electoral roll-rangko nipilon, electoral roll-rango niam gri biming segatanirangko bang·en nikna man·aha.
GSU Phulbari regional unit-ni president Chuang Neyzer R Marak-ni u·iatani gitade, Phulbari constituency-o pu·ongiparangni batrorobaengani gimin 2025 bilsini voter list-ko name nion, ia voters list-o nokdang ge·saon sak 176 manderang donga aro nokdang ge·gegipino sak 84 manderang donga ine nikna man·aha.
“Phulbari constituency-o ta·raken pu·ongiparang batrorobaengani gimin maibade ong·enga inen chinga chanchichipna a·bachengaha aro 2025 bilsini voter list-ko nion aiao inmanbeaha. Electoral roll-rangko ning·tubate sandirokangkua ong·ode iana bateba aiao inmangipa case-rangko nikangkunaba gnang,” ine Marak parakataha.
Marak-ni parakatani gitade, je nokdangon 2025 bilsini voter list-o sak 176 pu·ongiparang donga, 2005 bilsini voter list-ode sak 14 pu·ongiparangsan dongaiachim.
“Ia nokdango pu·ongiparangni bang·aniko hisapgenchimode, bi·sarangko man·gope gimik sak 250-nan batnaba gnang. Mingsa aiao inmananide, biming segatgipa voter-rangni bilsiara bilsi 30-50-ni gisepo ong·giparangsa ong·ani gimin uamangni ma·a paani bilside apsan ong·na nangani katta nakatjachim. Uamangni ma·a paarang apsan ong·skajagenchimode aro nok para ra·esa dongenga ong·ode maikai uamang Meghalaya a·doko voter ID-rangko man·skaaha? Ia pu·ongiparangni ma·a paa apsan ong·bebegenchimode, ma·gipa pagipa sakgnian bilsi 250-mang ong·skana nangengaha, ong·jaode uamangni dedrangrangko gipin biaprangonikosa rimbae alduna nangaha,” ine GSU Phulbari unit-ni president parakataha.
Ia pu·ongiparangara a·songo songdongkamgiparangan ong·bebegenchimode maikai uamangni bimingrang, 2005 bilsini electoral roll-rango donggija, 2025 bilsini electoral roll-rangode dongskaaha ineba Marak sing·doataha.
2005 bilsini electoral roll-o pu·ongipa sakbri donge, 2025 bilsini electoral roll-o sak 84 pu·ongiparang donggipa nokdangni gimin janapatskaengon, “Maikai jikse, bilsi 20-ni gisepon sak 80 bi·sarangko ba·na man·aha?” ine Marak sing·doatenba, ia pu·ongiparangoni mitamde ma·a paana baten bilsi batskaaha ine matnangataha.
Indake ong·engon, GSU Phulbari unit-ni electoral roll-rangko sandirokanio, nokdang ge·saon jat ge·gnini manderang apsan dongenga ineba nikna man·aha aro ian tol·e election ID card tariani sakkiko mesokaha.
“Chasongnaba an·ching jatskako mitchigrikgipa jatgnini apsan janggi tanganiko aro apsan babilsio cha·rim ringrimaniko nika dongkuja indiba ian Garo Hills-ni a·kawe jolo ong·enggipa obosta ong·a,” ine GSU Phulbari unit-ni president, electoral roll-rango biming segatgiparangkoba matnangataha.
Garo Hills-o, mongsongbate a·kawe jolrango niam gri napsrukbae songdong a·chagiparangko aro niam gri electoral roll-rango biming segatgiparangko sandina gita Garo Hills-ni dingtang dingtang dolrang, Special Intensive Revision (SIR)-ko dakchina dabitokengachim.
