NGH-o be·enni gita cholgri ong·gipa manderangna bosturangko suala

RESUBELPARA: North Garo Hills a·jao be·enni gita cholgri ong·gipa manderangna aro budepa butchumarangna, dingtang dingtang bosturangko suale on·na gita Sukrobar salo, Indian Oil Corporation Limited (IOCL)-ni Corporate Social Responsibility (CSAR) ning·o, dingtangmancha program-ko North Garo Hills a·jani Resubelpara Multi Purpose Cooperative Society Hall-o ong·atangaha.
Ia program-ko IOCL, North Garo Hills a·jani District Administration aro District Social Welfare Office (DSWO) baksa nangrime, be·enni gita cholgri ong·gipa manderang aro budepa butchumarangni re·a doani, jakgitelani aro janggi tangani gadangko namdapatna gita ong·atangaha.
Ia bosturangko, a·dokni Tourism Minister Timothy D Shira, mongsonggipa sokgipa ong·e, be·enni gita cholgri ong·gipa manderangna aro budepa butchumarangna suale on·angaha aro ia bosturangko North Garo Hills a·ja gimikni sak 584 manderang man·rikaha.
Be·enni gita cholgri ong·gipa manderangna aro budepa butchumarangna suale on·anggipa ma·manti bosturangara, motorized tricycle, tricycle, wheelchair, hearing aid, cervical collar, crutch, walker aro uandakgipa bosturang ong·a.
Ia tom·anio, a·dokni Tourism Minister, tom·anio bak ra·giparangna aganprakangengon, dingtang dingtang dakchakani bosturangko indin on·gilanichi, be·enni gita cholgri ong·gipa manderang aro budepa butchumarangni janggi tanganiko namdapatengani gimin IOCL-ko mittelpilangaha aro North Garo Hills a·jao assessment camp-rangko ong·ate, be·enni gita cholgri ong·gipa manderangna aro budepa butchumarangko biming segatahani gimin ua District Administration aro DSWO-koba mittelpilangaha.
IOCL-ni iandakgipa program-chi dakchakanirangko on·enganiara, be·enni gita cholgri ong·gipa manderang aro budepa butchumarangni janggi tanganio dingtanganiko ra·bana man·gen ineba Shira aganaha.
Be·enni gita cholgri ong·gipa manderangni janggi tanganiko altubatatna gita dingtang dingtang dakchakani bosturangko tarie on·engani gimin ua, Artificial Limbs Manufacturing Corporation of India (ALIMCO)-ni kamrangkoba mittelpilangaha.
Da·o dipet India a·songo ALIMCO-mangmangsan, be·enni gita cholgri ong·gipa manderangna dingtang dingtang dakchakani bosturangko tarie on·gipa bimang ong·enga ine nikna man·a.
Ia tom·anio North Garo Hills a·jani Deputy Commissioner Dr Abhishek Saini-ba jinmana aganprakengon, be·enni gita cholgri ong·gipa manderangna aro budepa butchumarangna sorkarini aro District administration-ni ka·enggipa kamrangni gimin talate on·angenba, dakchakaniko nangenggipa manderangna sorkari aro administration-ni do·garang pangnan oe donenga ine parakangaha.
Iandakgipa namgnirangko pilakan man·china gita rakbate kamrangko ka·angkuchina gitaba ua DSWO-ko didiangaha.
Ia tom·anio, IOCL-ni Chief Manager Malati Malakar-ba jinmana aganprakengon, IOCL-ara garirangna petrol-rangko aro nokdangrangna LPG-rangkosan on·enggipa ong·ja indiba songsalo dakchakanirangko nangenggipa manderangnaba ma·manti bosturangko on·gilanichi, India a·songko tang·doatna kamko ka·enga ine parakataha.
Iana skang, North Garo Hills a·jani District Social Welfare Officer (DSWO) Norimchi Sangma, rimchaksoani kattarangko aganangengon, Deputy Commissioner-ni tangka paisarangko dakchake on·anichisa a·jani dambri block-rangon assessment camp-rangko ong·atna man·e, ia program-ko chu·sokgipa ong·atna man·aha ine mittelpilaniko parakangaha.