WILLIAMNAGAR: Buring Bolgrim-ko ripinge rakkina miksonganio Meghalaya sorkari East Garo Hills a·jao Bijasik Matwa A·pal Community Reserve-ko parakata, uandake ia Reserve-ko Wildlife (Protection) Act, 1972 ni ning·o chel·chake rakkianggen.
Batanggimin April 22 tariko Forest & Enviroment Department-ni u·iatani gita, Songsak Block-o donggipa ia Reserve-ko janapgimin niamni Section 36 C-ni ning·o ra·gatenga ine u·iataha. A·dok sorkarini gital parakatgipa Reserve-ni apalanian 20.89 hectares-mang ong·a, uandake ia gital Reserve-o buring bolgrim aro do·o matrangko ripingna unbaksa chiring chibisikko tange rakkina sorkari baksa kam ka·anio ian dakchakbeani ong·gnok.
Ia gital Reserve-ko parakatan baksanaba Reserve-ko nirok-sandianiko dakna gita Community Reserve Management Committee-koba bikote on·angaha. Uandake ia Committee-na joltangni Charon C Marak ko chairman-na seokaha aro uan Reserve-ni Warden-ba ong·gen unbaksa gipinrangko committee member-na seokaha. Unbaksana Divisional Forest Officer Member Secretary ong·e dangdike on·angskagen. Garo Hills-ni buring bolgrim aro do·o matrangko ripinge rakkina ian nambegipa ja·ku de·ani ong·a.
