CHOKPOT: South Garo Hills a·jani Chokpot jolrango mobile network aro bijoliko on·ani tik ong·jaengani a·sel jolo songdongenggipa manderang neng·nikanirangko chagrongna nangtokenga ine dolsa CSO-ni gitcham membor aro Chokpot jolo songdongenggipa Mansrang Ch Marak, South Garo Hills a·jani Deputy Commissioner-na badi ka·doataha.
“Ia salrango, Chokpot jolo donggipa bang·a songrangon, Airtel aro Jio mobile network baksana bijoliko on·aniba namsrangjaengani a·sel, songni nokni manderang neng·nikanirangko chagrongna nangtokenga,” ine Marak, Deputy Commissioner-na badi ka·e sedoatgipa chittio parakataha.
Marak-ni parakatani gitade, Chokpot jolrango salantian gita dake bijoli sirongengani a·selan skul aro college-rango poraienggipa chatro chatrirang, attamahaode poraina man·tokjae, neng·nikanirangko chagrongna nangtokenga. Unbaksana mobile network-rang namrongjani a·selan chatro chatrirang, an·tangtangni kamrangko matchotna man·tokjaenga ineba Marak parakataha.
“Ia internet-ni chasongo, network-rangko name on·na man·jahaode, nangchongmotgipa kamrangkoba ka·na man·jaha aro sorkarini dingtang dingtang kamrangkoba matchotna man·ja. Ia jolrango mobile network baksana bijoliba sirongengani a·selan songni nokni manderang, salanti janggi tanganio pilakni gitan neng·nikanirangko chagrongna nangenga,” ine South Garo Hills a·jani Deputy Commissioner-na badi ka·e sedoatgipa chittio Marak parakataha.
Chokpot jolrangna mobile internet aro bijoliko nambate on·na gita ge·etanirangko on·chinaba Marak, Deputy Commissioner-ko didiataha.
