TURA: Meghalaya a·dokni Deficit skul aro college-rango skigiparang, a·dok sorkarini ra·chakanggipa Meghalaya Non-Government Schools & College Employees Centralised Provident Fund Scheme 2026-ko jegalna gita Sombar salo, skul aro college-tangtango poster campaign-ko ong·atangaha.
Ia poster campaign-ko ong·atanio, Meghalaya College Teachers Association (MCTA), Khasi Jaintia Deficit School Teachers Association, Garo Hills Deficit School Teachers & Employees Association aro Meghalaya College Non-Teaching Staff Association nangrime, sorkarini ra·chakgipa scheme-ko jegalna gita bak ra·angtokaha.
Ia scheme-ko deficit skul aro college-rango kam ka·giparangni jegalengani gimin talataniko on·angengon, batanggimin salrango uamang, Meghalaya Non-Govt Deficit School and Colleges Centralised Provident Fund Scheme 2026-ni bidingo sorkari baksa golpogrikaha aro ia scheme-kosa sorkari on·na ku·rachakahachim, indioba rang·gitik ia gitalgipa scheme-kosa skigiparangna dake on·skaaha aro ian ra·chakna man·gijani ong·a ine Garo Hills Deficit Schools Teachers Association-ni general secretary Dr Brian Sengsrang Marak, kobor ra·timgiparangna parakataha.
Ia poster campaign-ko ong·atanio, deficit skul aro college-rango kam ka·giparang, dingtang dingtang seanirang, jekai ‘Skulo skigiparang, a·songni krongrang ong·a, chingko dilsretnabe’, ‘Gital niam 2026-de pension-ba ong·ja, NPS-ba ong·ja’, ‘Chingni CPF chingni man·gnian ong·a’ aro dingtang dingtang kattarangko see Meghalaya a·dokni dingtang dingtang College aro skulrango namnikgijaniko mesokangaha.
“Deficit skulrango skigiparang bang·a neng·nikanirangko ra·bite dedrangrangna aro a·songna-jatna dangdike on·paenga. Dormaharangko jaanti man·gijani, DA-rangko bariatgijani aro uandake dingtang dingtang man·a nanganirangko somai gita man·gijaniara deficit skulrangko nichanggalani gita ong·chongmota,” ineba Dr Marak parakataha.
Deficit skul aro college-ni skigiparang gital CPF scheme-ko jegalgrima
Date:
Share post:
